ރައްޔިތުންގެ މަޖިލީހުގެ ޤަވާއިދާއި އެއްގޮތަށް، އާއްމު އުސޫލުން މަޖިލީހުގެ ޖަލްސާ ބޭއްވުމަށް ގޮވާލައި، ރައްޔިތުންގެ މަޖިލީހުގެ ހެންވޭރު ހުޅަނގުދާއިރާގެ މެމްބަރު އަދި ދަ ޑިމޮކްރެޓްސްގެ ރައީސް ހަސަން ލަޠީފް ރައްޔިތުންގެ މަޖިލީހަށް މައްސަލައެއް ހުށައަޅައިފިއެވެ.

ރައްޔިތުންގެ މަޖިލީހުގެ އިދާރާއަށް ހަސަން ލަޠީފް އެ މައްސަލަ ހުށައަޅުއްވާފައި ވަނީ މިދިޔަ ބުރާސްފަތި ދުވަހުގައެވެ.

މެމްބަރު ޙަސަން ލަޠީފް ވިދާޅުވީ، ޖަލްސާތައް ނުބާއްވައި ހުއްޓާލައިގެން ނުވާނެ ކަމަށާއި ނިންމަން ހުރި މުހިއްމު އެތައް މަސައްކަތެއް މަޖިލީހުގައި އެބަހުރިކަމަށެވެ.

Advertisement

މެމްބަރު ހަސަން ލަޠީފް މަޖިލީހަށް ހުށައެޅި މައްސަލައިގައި ވިދާޅުވެފައި ވަނީ، ރައްޔިތުންގެ މަޖިލީހުގެ ޤަވާއިދުގެ 47 ވަނަ މާއްދާގައި މަޖިލީހުގެ ދައުރުތެރޭގައި ހިނގާ އާއްމު ޖަލްސާތައް ހަފްތާއަކު 3 ދުވަހު ބާއްވަން ވާނެކަމަށް ބަޔާންކޮށްފައިވާއިރު، އަދި އެޤަވާއިދުގެ 25 ވަނަ މާއްދާގައި ވަރަށް ސާފުކޮށް، ޖަލްސާތައް ބާއްވަންޖެހޭ ދުވަސްތަކާއި ތާވަލް އޮންނަން ޖެހޭ ގޮތަށް ބަޔާންކޮށްފައި ވާއިރު، އަދި އެދުވަސްތަކަކީ، ހަފްތާާގެ ހޯމަ އަންގާރަ ބުދަ ދުވަސްކަމުގައި ކަނޑައަޅާފައިވާ ކަމަށެވެ. އަދި އެނޫންގޮތަކަށް ޖަލްސާތައް ނުބާއްވަން ނިންމުމެއް ނިންމާފައި ވާއިރު، ރައްޔިތުންނާއި ދިވެހި ދައުލަތުގެ މަސްލަޙަތާއި ގުޅުން ހުރި އަދި ޤާނޫނު އަސާސީން ރައްޔިތުންގެ މަޖިލީހައި މަތިކޮށްފައިވާ ދުސްތޫރީ ޒިންމާތަކާއި ގުޅުން ހުރި އެތައް މަސައްކަތްތަކެއް މިހާރުވެސް ކުރަން އެބަހުރި ކަމުގައި ހަސަން ލަޠީފް ހުށައެޅުއްވި މައްސަލައިގައި ވިދާޅުވެފައިވެއެވެ.

ރައްޔިތުންގެ މަޖިލީހުގެ ޖަލްސާތައް ބޭއްވުމަށް ގޮވާލައްވައި މެމްބަރު ހަސަން ލަޠީފް މަޖިލީހަށް މައްސަލަ ހުށައެޅުއްވި އިރު، ހުސްވި ހަފްތާގައި މަޖިލީހުގެ ޖަލްސާއެއް ބާއްވާފައި ވަނީ ބުދަ ދުވަހު އެކަންޏެވެ. 

ރައްޔިތުންގެ މަޖިލީހުގެ އިދާރާއިން ހާމަކުރައްވާފައިވާ ގޮތުގައި، އާއްމު ޝެޑިއުލާއި އެއްގޮތަށް މަޖިލީހުގެ ޖަލްސާތައް ނުބާއްވާ ގޮތަށް ހަމަޖައްސައ، މަޖިލީހުގެ ޖަލްސާތައް ބޭއްވުން މަދުކޮށްލީ، ރައްޔިތުންގެ މަޖިލީހުގައި ހިމެނޭ ސިޔާސީ ޕާޓީތަކުގެ ޕާލަމެންޓްރީ ގްރޫޕުތަކުގެ ލީޑަރުންނާއި މަޝްވަރާކުރެއްވުމަށްފަހުގައި އެފަރާތްތަކުން އެގޮތަށް އެދިވަޑައިގަތުމުންނެވެ. އެހެން ނަމަވެސް އެބައްދަލުވުމުގައި މެމްބަރު ހަސަން ލަޠީފުވެސް އަދި ދަ ޑިމޮކްރެޓްސްގެ އެހެން މެމްބަރަކުވެސް ބައިވެރިވެވަޑައިގެންފައި ނުވެއެވެ.