އެކި މައްސަލަކާއި އޮޕަރޭޝަންތަކުގައި ފުލުހުން އަތުލައިގެންފައިވާ މަސްތުވާތަކެތީގެ ތެރެއިން، 103 ކިލޯގެ މަސްތުވާތަކެތި، އަންދާލައިގެން މިއަދު ނައްތާލައިފިއެވެ.

މިމަސްތުވާ ތަކެތި ނައްތާލާފައި ވަނީ މިއަދު މެންދުރު ދޫނިދޫގައެވެ. 

ފުލުހުންގެ އިދާރާއިން ވިދާޅުވީ، ނައްތާލެވުނު މަސްތުވާތަކެތީގެ ތެރޭގައި ހިމެނެނީ، ފުލުހުންބެލި މަސްތުވާތަކެތީގެ 958 މައްސަލައަކާއި، 197 ހާދިސާއަކާއި ގުޅިގެން ހެކީގެ ގޮތުގައި ހޯދުނު 3121 ހެއްކެވެ. 

އޭގެތެރޭގައި، މަސްތުވާތަކެތިހުރި 8293 ރަބަރު ޕެކެޓު، 2731 ސެލޯފިންކޮޅު، ފިލްމުހުސްކުރި 237 ދަޅު، 585 ބުލެޓު އަދި 30 ބިޑީގެ އިތުރުން 537 މަނާ ބޭސްގުޅަ ހިމެނޭ ކަމަށާއި، އަދި އެހެނިހެން ތަކެތީގެ ގޮތުގައި 3045 އެއްޗެއް ނައްތާލާފައިވާ ކަމުގައިވެސް ފުލުހުންގެ އިދާރާއިން ވިދާޅުވިއެވެ.

މިއަދު ނައްތާލި މަސްތުވާތަކެތީގެ މަގުމަތީ އަގު، 400 މިލިއަނަށް ވުރެ މަތިވާނެ ކަމުގައިވެސް ފުލުހުން ވިދާޅުވިއެވެ.

ފުލުހުންގެ އިދާރާއިން ވިދާޅުވީ، މަސްތުވާތަކެތި ނައްތާލުމުގައި ގެންގުޅޭ އުސޫލުތަކަށް އެންމެ ފަހުން ގެނެސްފައިވާ ބަދަލުތަކާއެކު، އެކި މައްސަލަތަކުގައި ފުލުހުންގެ ބެލުމުގެ ދަށަށް ގެނެވޭ މަސްތުވާތަކެތީގެ ތެރެއިން އެ މައްސަލައެއް ތަހުގީގު ކުރުމަށް ގާނޫނީގޮތުން ބެހެއްޓުމަށް ލާޒިމުކުރާ މިންވަރަށް ބެހެއްޓުމަށްފަހު ބާކީ ހުންނަ މަސްތުވާތަކެތި ވީއެންމެ އަވަހަކަށް ނައްތާލަމުން ގެންދާ ކަމަށެވެ.

އަދި މަސްތުވާތަކެތި ނައްތާލުން ކުރިއަށް ގެންގޮސްފައިވަނީ ފުލުހުންގެ ބެލުމުގެ ދަށަށް ގެނެވޭ މަސްތުވާތަކެއްޗާއި މަސްތުވާތަކެތީގެ މައްސަލަތަކާ ގުޅިގެން ހިފެހެއްޓޭ ތަކެތި ނައްތާލުމުގައި އަމަލުކުރާނެ ގޮތުގެ ގަވާއިދުގެ ދަށުން އެކަމަށްޓަކައި އެކުލަވައިލާފައިވާ ކޮމިޓީގެ ބެލުމުގެ ދަށުންކަމުގައިވެސް ފުލުހުންގެ އިދާރާއިން ވިދާޅުވިއެވެ.