ދެކުނު ގައްޒާގެ ރަފާހް ސިޓީއަށް އިސްރާއިލުން ދިން ވައިގެ ހަމަލާއެއްގައި ފަލަސްތީނުގެ 14 މީހަކު ޝަހީދުކޮށްލައިފިއެވެ. މަންޒަރުދުށް މީހަކު ބުނެފައިވާ ގޮތުގައި، ޝަހީދުކޮށްލާފައިވާ މީހުންގެ އިތުރުން އެތައް ބަޔަކު ވަނީ މި ހަމަލާއާއި ގުޅިގެން އިމާރާތްތަކުގެ ދަށުގައި ތާށިވެފައެވެ.

މި ހަމަލާގެ ކުރިން އިސްރާއިލު ސިފައިން ވަނީ ހޮނިހިރު ދުވަހުގެ ހަވީރު ރަފާހްގެ ވަގުތީ ހިޔާތަކަށް ޑްރޯން ހަމަލާއެއްދީ 11 މީހަކު ޝަހީދު ވެސް ކޮށްލާފައެވެ.

އެންމެ ފަހުން ރަފާހްއަށް ދިން މި ހަމަލާއާ ގުޅިގެން ހަތަރު ބުރީގެ އިމާރާތެއް ވަނީ ބިމާހަމަވެފައެވެ. ފަލަސްތީނުގެ ނޫސްތަކުން ރިޕޯޓުކޮށްފައިވާ ގޮތުގައި، މި ހަމަލާގައި 6 ކުޑަ ކުއްޖަކު ޝަހީދުވެފައިވާއިރު، އެތައް ބަޔަކަށް ވަނީ އެކިވަރުގެ އަނިޔާ ލިބިފައެވެ.

Advertisement

ފަލަސްތީނުގައި ސަލާމަތީ މަސައްކަތް ކުރާ މީހަކު ހާމަކޮށްފައިވާ ގޮތުގައި، އިމާރާތްތަކުގެ ދަށުވެފައި ތިބި މީހުން ސަލާމަތްކުރުމަށް އެކަށޭނަ އާލާތްތައް އެމީހުންގެ އަތުގައި މިހާރު ވަރަށް މަދެވެ. އަދި ހަނގުރާމައިގެ 6 ވަނަ މަސް ހިނގަމުންދާއިރު، މިހާރު ތެޔޮ ލިބުން ދަތިވެފައިވުމުން، މިކަމަށް ބޭނުންވާ ބަރު އުޅަނދުތައް އޮޕަރޭޓް ނުކުރެވި ހުއްޓާލަންޖެހިފައިވާކަމަށް ވެސް އޭނާ ބުނެފައިވެއެވެ. އަދި މިކަމުގެ ސަބަބުން، މީހުން ސަލާމަތްކުރުމަށް ބޮޑެތި ގޮންޖެހުންތައް ވަނީ ކުރިމަތިވެފައެވެ.

މި ހަމަލާގެ އިތުރުން ހުޅަނގު އައްސޭރީގެ ގިނަ ސަރަހައްދުތަކަށް ވެސް އިސްރާއިލުން އަންނަނީ ހަމަލާ ދެމުންނެވެ. އޭގެ ތެރޭގައި ތުލްކަރެމް އާއި ގަލްގިލްޔާ ސިޓީގެ އައްޒުން އަދި ޖައްޔޫސް ޝަހަރު ހިމެނެއެވެ.

އޮކްޓޯބަރު 7 ގައި ހަނގުރާމަ ފެށިފަހުން މިހާތަނަށް ޖުމްލަ 30،320 މީހަކު ވަނީ ޝަހީދުކޮށްލާފައެވެ. އަދި 71،533 މީހަކަށް ވަނީ އެކިވަރުގެ އަނިޔާ ލިބިފައެވެ.