ކަނޑުމަތީގައި 14 ޑައިވަރުން އޮޔާދަނިކޮށް ފުލުހުން ސަލާމަތްކޮށްފިއެވެ. ފުލުހުން ބުނީ މެރިން ޕޮލިސް ލޯންޗެއް މިއަދު ހެނދުނު ފުވައްމުލަކުން ފުރައިގެން ގދ. އަތޮޅަށް ދަތުރު ކުރަމުން ދަނިކޮށް ގދ. ގަން ކައިރި، ކަނޑުމަތިން ޑައިވަރެއް ފެނިގެން ލޯންޗު އެ ސަރަހައްދަށް ދިޔައިރު އިތުރު ދެ ޑައިވަރުން ފެނުނު ކަމަށެވެ.

ލޯންޗު އެ ސަރަހައްދަށް ކައިރި ކުރުމުން އިތުރު ޑައިވަރުންތަކެއް އޮޔާ ދާ ކަމުގެ މައުލޫމާތު ލިބިގެން ފުލުހުން ވަނީ ކަނޑުމަތި ބަލާފައެވެ.

ފުލުހުން ސަލާމަތްކުރި މީހުންގެ ތެރޭގައި ހިމެނެނީ ރަޝިއާގެ 10 ޑައިވަރުންނާއި ދިވެހި ހަތަރު އިންސްޓްރަކްޓަރުންނެވެ.

ޕޮލިސް ލޯންޗުގައި އެ މީހުން ގެންދިޔައީ ގދ. ގައްދުއަށެވެ. ޑައިވްކުރަން އެ މީހުން ދިޔަ ސަފާރީ ވެސް ހޯދައި މިހާރު ވަނީ ހަވާލުކޮށްފައެވެ.

މި އެންމެންގެ ހާލުވެސް ރަނގަޅުކަމަށް ފުލުހުން ބުނެއެވެ. ފުލުހުން ވަނީ މޫދަށް އެރޭ މީހުންނާއި ޑައިވަރުން، މޫސުމާއި އޮއެވަރަށް ބެލުމަށް އިރުޝާދު ދީފައެވެ.