އީދު ނަމާދު ފަށާ ގަޑި އަވަސްކުރުމުގެ މަޝްވަރާ އިސްލާމިކް މިނިސްޓްރީން ފަށައިފިއެވެ. އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ވިދާޅުވީ، އީދު ނަމާދު ޖަމާއަތް ފެށޭ ގަޑި އަވަސްކުރުމާ މެދު މަޝްވަރާކުރަމުންދާކަމަށެވެ. 

އެ މަޝްވަރާތައް ކުރަމުން އަންނަނީ އީދު ނަމާދު ފެށޭ ގަޑި މިހާރު ލަސްވުމުގެ ސަބަބުން، އާންމުންގެ ފަރާތުން ޝަކުވާ ލިބެމުންދާތީ ކަމަށް މައުލޫމާތުލިބެއެވެ. އިސްލާމިކް މިނިސްޓްރީން ވިދާޅުވީ، އާންމުންގެ ފަރާތުން ޝަކުވާ ލިބެނީ އީދު ނަމާދު ފަށާ ގަޑި ލަސްވުމުގެ ސަބަބުން އަވިއަރާތީ އެކަމުގެ އުނދަގޫތައް ކަމަށެވެ. އެހެންކަމުން ގަޑި އަވަސްކުރުމަށް މަޝްވަރާ ކުރެވެމުންދާކަމަށެވެ. މިކަމުގައި އަދި ވަކި ގޮތެއް ނުނިންމާކަމަށް އެ މިނިސްޓްރީން ވަނީ ބުނެފައެވެ. 

އިސްލާމިކް މިނިސްޓްރީން ބުނީ މަޝްވަރާކުރަމުން އަންނަނީ މިހާރު ފަށާ ވަގުތަށް ވުރެ ގާތްގަނޑަކަށް 30 މިނެޓު ވަރު އަވަސް ކުރެވޭތޯ ކަމަށެވެ. މިހާރު އީދު ނަމާދު ޖަމާއަތް ފަށަނީ ހެނދުނު 7:30ގަ އެވެ.