ރައީސުލް ޖުމްހޫރިއްޔާ ޑޮކްޓަރ މުޙައްމަދު މުއިއްޒު ވެވަޑައިގެންފައިވާ ވައުދާ އެއްގޮތަށް، މާޗު 1 ވަނަ ދުވަހު އެއާ އެމްބިއުލޭންސްގެ ޚިދުމަތް ފެށިފަހުން، އެ ބޯޓުގެ ފުރަތަމަ ދަތުރު ރޭ ފަތިހުކޮށްފިއެވެ. 

ބޯޓުގެ ފުރަތަމަ ދަތުރަކީ ކުޅުދުއްފުށީ ރީޖަނަލް ހޮސްޕިޓަލުގައި އޮތް ބަލިމީހަކު، އިތުރު ފަރުވާއަށް މާލެ ގެނައުމަށް ކުރި ދަތުރެކެވެ. މި ބޯޓު ވެލާނާ އިންޓަނޭޝަނަލް އެއާޕޯޓުގައި ޖައްސާފައިވަނީ ރޭ މެންދަމުން އަނބުރާ 3:40 ހާއިރުއެވެ.

މި ބޯޓުގައި ސިއްހީ ހިދުމަތް ދިނުމަށް ތަމްރީނުކޮށްފައިވާ 15 މީހަކު ހަރަކާތްތެރިވާނެކަމަށް ސަރުކާރުން ވަނީ ބުނެފައެވެ.

އެއާ އެމްބިއުލޭންސްގެ ގޮތުގައި ބޭނުންކުރަމުންދާ މަތިންދާ ބޯޓަކީ، ކުރިން މޯލްޑިވިއަންގެ ޝެޑިއުލް ދަތުރުތަކުގައިވެސް ބޭނުން ކުރަމުން އައި ބޯޓެއް ކަމަށެވެ. އަދި އެއާ އެމްބިއުލާންސްގެ ގޮތުގައި އެބޯޓު ބޭނުން ކުރަންފަށާފައި ވަނީ އެމާޖެންސީ ފަރުވާ އޭގައި ދެވޭ ގޮތަށް، މެޑިކަލް އިކުއިޕްމެންޓްވެސް ހަރުކޮށްގެން ކަމަށާއި، އެކުންފުނިން މަތިންދާ ބޯޓުތައް ދުއްވުމުގައި އަބަދުވެސް އެންމެ އިސްކަންދޭނީ، ކްރޫއިންނާއި ދަތުރުވެރިންގެ ސަލާމަތާއި ރައްކާތެރިކަމަށް ކަމުގެ ޔަޤީންކަން ދޭކަމުގައިވެސް އައިލެންޑް އޭވިއޭޝަނުން ވަނީ ބުނެފައެވެ.