ވެރިކަމަށް އައިގޮތަށް މިސަރުކާރުން ދަނީ ޑިމޮކްރެޓިކް ނިޒާމް ހަލާކުކޮށްލައި ޚުދުމުހުތާރު ވެރިކަމެއް ޤާއިމްކުރުމަށް މަސައްކަތް ކުރަމުން ކަމުގައި ކުރީގެ ރައިސުލްޖުމްހޫރިއްޔާ އިބްރާހީމް މުޙައްމަދު ޞާލިހް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އެމްޑީޕީގެ މަޖިލިސް ކެމްޕޭނުގެ ތެރެއިން މިރޭ އެޕާޓީގެ ހަރުގޭގައި ބޭއްވި، "ދޮގު ދޮލަނގު" ޖަލްސާގައި ވާހަކަފުޅު ދައްކަވަމުންނެވެ.

ރައީސް ޞާލިޙް ވިދާޅުވީ، މިސަރުކާރު ވެރިކަމަށް އައުމާއި އެކީގައި ފުރަތަމަ ކުރަންފެށި ކަމަކީ، ފައްކާވެފައި އޮތް ހަލާކުކޮށްލައި ޚުދު މުޚުތާރުވެރިކަމެއް ޤާއިމް ކުރުމުގެ މަސައްކަތް ކަމަށެވެ. އެގޮތުން ދޮގުހަދައި އޮޅުވާލުމުގެ އިތުރަށް، ޤާނޫނު އަސާސީން ދީފައިވާ ޙައްޤުތައް ހިފެހެއްޓުމުގެ މަސައްކަތްވެސް މިސަރުކާރުން ކުރަމުން އަންނަ ކަމުގައި ރައީސް ޞާލިޙް ވިދާޅުވިއެވެ.

ރައީސް ޞާލިޙް ވިދާޅުވީ، މިސަރުކާރުން އެންމެ ފުރަތަމަ ކުރި ކަމަކީ ނޫސްވެރިކަމުގެ މިނިވަންކަން ހުއްޓުވުމަށްޓަކައި މަސައްކަތް ކުރުން ކަމަށާއި، އެގޮތުން ނޫސް ވެބްސައިޓްތައް ސަރުކާރުން ބްލޮކްކުރިކަން އެމަނިކުފާނު ފާހަގަކުރެއްވިއެވެ. އަދި އެމްޑީޕީއަށް މަޖިލީހުގެ މެޖޯރިޓީ ނުލިބިއްޖެނަމަ ސަރުކާރުން ހުރިހާ އޮންލައިން ނޫސްވެބްސައިޓްތައް ބަންދުކުރާނެ ކަމަށާއި އެސަބަބަށްޓަކައިވެސް އެމްޑީޕީއަށް މަޖިލީހުގެ މެޖޯރިޓީ ހޯދުން މުހިއްމު ކަމުގައި ރައީސް ޞާލިޙް ވިދާޅުވިއެވެ.

ރައީސް ސާލިޙް ވިދާޅުވީ، ޑިމޮކްރެޓިކް ނިޒާމް ހަލާކުކޮށްލުމަށް މިސަރުކާރުން ކުރި ދެވަނަ މަސައްކަތަކީ ރައްޔިތުންގެ މަޖިލީހުގެ ބާރު ކަނޑުވާލަން މަސައްކަތް ކުރުންކަމަށެވެ. 

ރައީސް ޞާލިޙް ވިދާޅުވީ، އެއީ ރައްޔިތުންގެ މަޖިލީހުގެ މެމްބަރުންގެ އަގުވައްޓާލައި ބާރު ކަނޑުވާލުމަށްޓަކައި ކުރެއްވި ފުރަތަމަ ކަންތައް ކަމަށެވެ. އޭގެ އިތުރުން ރައްޔިތުންގެ މަޖިލިސް ހުޅުވާ ދުވަހަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސާފައި އޮތް އޮތުން އުވާލުމަކީ، މަޖިލީހުގެ ޤަދަރާއި ހައިބަތަށް އިހްތިރާމްކުޑަކޮށް އެއީ އެއްވެސް ކަމެއް ނޫންކަމަށް ހެދުންކަމުގައިވެސް ރައީސް ޞާލިހް ފާހަގަކުރެއްވިއެވެ.

ރައީސް ޞާލިޙް ވިދާޅުވީ، ރޯދަމަހު އިންތިޚާބު ބޭއްވުމަށް ބާރުއަޅައި ނުފޫޒު ފޯރުވުމަކީވެސް ސަރުކާރުން ޑިމޮކްރެޓިކް ނިޒާމް ހަލާކުކޮށްލުމަށް ކުރި މަސައްކަތްތަކުގެ ތެރޭގައި ހިމެނޭ ކަމެއް ކަމަށެވެ. އަދި އެއީ އެތައްބައެއްގެ ހައްޤެއް ނިގުޅައިގަތުމަށް ކުރެއްވި މަސައްކަތެއް ކަންވެސް ރައީސް ޞާލިޙް ފާހަގަކުރެއްވިއެވެ.

މީގެ އިތުރުން މިހާރު އިންތިޚާބު ބޭއްވުމަށް އަލުން ކަނޑައަޅާފައިވާ އޭޕްރީލް މަހުގެ 21 ވަނަ ދުވަހަކީ، ރަސްމީ ބަންދު ދުވަހެއްގެ ގޮތުގައި ހަމަނުޖައްސަވައި އޮތުމަކީވެސް ނުފޫޒު ފޯރުވުންކަމާއި، ރާއްޖޭގައި ބޮޑެތި އިންތިޚާބުތައް ބާއްވާ ދުވަހަކީ، ރަސްމީ ބަންދު ދުވަހެއްގެ ގޮތުގައި ސަރުކާރުން ހަމަޖައްސަވަމުން އައިކަންވެސް ރައީސް ޞާލިޙް ވަނީ ފާހަގަކުރައްވާފައެވެ.

ރާއްޖެ ހަމަމަގަށް އެޅުވުމަށް، ކުރިޔަށް އޮތް ރައްޔިތުންގެ މަޖިލީހުގެ އިންތިޚާބުގައި ވާދަކުރައްވާ ކެންޑިޑޭޓުންނަށް، ތާއީދުކޮށް، މަޖިލީހުގެ މެޖޯރިޓީ އެމްޑީޕީއަށް ހޯދުމަށް ރައީސް ޞާލިޙް ވަނީ، އެމްޑީޕީގެ މެމްބަރުންގެ ކިބައިން އެދިވަޑައިގަންނަވާފައެވެ.