މިއަހަރު ބޭއްވުމަށް ހަމަޖައްސާފައިވާ ރައްޔިތުންގެ މަޖިލީހުގެ އިންތިޚާބު ބާއްވާ ތާރީޚަކީ 21 އޭޕްރީލް 2024ވާ އާދިއްތަ ދުވަސްކަމުގައި އިލެކްޝަންސް ކޮމިޝަނުން ކަނޑައަޅައިފިއެވެ.

ކުރިން އިންތިޚާބު ބޭއްވުމަށް ހަމަޖައްސާފައި އޮތީ އަންނަ މާރިޗު މަހުގެ 17 ވަނަ ދުވަހުގައި ކަމަށް ވީ ނަމަވެސް އިންތިޚާބު އިލެކްޝަންސް ކޮމިޝަނުން އޭޕްރީލް 21އަށް ލަސްކުރީ، ރޯދަމަހު އިންތިޚާބުތައް ނުބާއްވާ ގޮތަށް، އާއްމު އިންތިޚާބާއި ބެހޭ ޤާނޫނަށް އިސްލާޙް ގެނައުމުގެ ބިލް ރައްޔިތުންގެ މަޖިލީހުން ދެވަނަ ފަހަރަށް ފާސްކޮށް އެބިލް މިރޭ ރައީސުލްޖުމްހޫރިއްޔާ ތަސްދީޤުކުރައްވަިއ ގެޒެޓްކުރެއްވުމާއި ގުޅިގެން، އިންތިޚާބު ބާއްވާ ތާރީޚް ފަސްކުރުމަށް ޤާނޫނުން އިލެކްޝަންސް ކޮމިޝަންގެ މައްޗަށް ލާޒިމް ވުމުންނެވެ.

އިލެކްޝަންސް ކޮމިޝަންގެ ނައިބު ރައީސް އިސްމާޢީލް ޙަބީބު ވިދާޅުވީ،  އިންތިޚާބުތަކާބެހޭ ޢާންމު ޤާނޫނަށް 5 ވަނަ އިޞްލާޙު ގެނައުމުގެ ޤާނޫނު މިއަދު ތަސްދީޤުކުރެއްވުމާ ގުޅިގެން، ރައްޔިތުންގެ މަޖިލީހުގެ އިންތިޚާބު، 2024 އެޕްރީލް 21 ވާ އާދިއްތަ ދުވަހު ބޭއްވުމަށް އިލެކްޝަންސް ކޮމިޝަނުން މިރޭ ނިންމަވައި، ވޯޓުލުން އެދުވަހުގެ ހެނދުނު 08:00 ން ހަވީރު 04:00 އަށް ކުރިޔަށް ގެންދިޔުމަށް ނިންމަވާފައިވާ ކަމަށެވެ. އަދި ވޯޓުގުނަން ފަށާނީ އެދުވަހުގެ ހަވީރު 4:30 ގެ ފަހުން ކަމަށާއި، ރަސްމީ ނަތީޖާ އިޢުލާންކުރާނީ 2024 އޭޕްރިލް 28 ގައި ކަމުގައިވެސް ޙަބީބު ވިދާޅުވިއެވެ.

ޙަބީބު ވިދާޅުވީ، އިންތިޚާބު ބާއްވާ ތާރީޚަށް ގެނެވުނު ބަދަލާ ގުޅިގެން 560 ޒުވާނުންނަށް އަލަށް ވޯޓުލުމުގެ ހައްޤު ލިބިގެންދޭކަމަށާއި، ރީރަޖިސްޓްރޭޝަން އަށް އިތުރު 3 ދުވަސް ދިނުމަށްވެސް ކޮމިޝަނުން މިރޭ ވަނީ ނިންމަވާފައި ކަމަށެވެ.

ރޯދަމަހު ރައްޔިތުންގެ މަޖިލީހުގެ އިންތިޚާބު ބޭއްވުމަށް ކުރިން އިލެކްޝަން ކޮމިޝަން އިން ނިމާފައި އޮތީ ރޯދަމަހުގެ ތެރޭގައިކަމަށްވާތީ އެކަމާއި ގުޅިގެން ސިޔާސީ ޕާޓީތަކުންނާއި އާއްމު ރައްޔިތުންވަނީ، ކަންބޮޑުވުންވެސް ފާޅުކޮށްފައެވެ.