އާދަމް އާޒިމް މާލެ ސިޓީ ކައުންސިލްގެ މޭޔަރު ކަމުގެ މަޤާމާއި ހަވާލުވެވަޑައިގެންނެވުމަށްފަހު ބާއްވަވާ ފުރަތަމަ ރައްޔިތުންގެ ބައްދަލުވުން މިރޭ ބާއްވަން ނިންމައިފިއެވެ. މިއީ ލާމަރުކަޒީ ގާނޫނުން ކޮންމެ ކައުންސިލަކަށް ވެސް ބޭއްވުމަށް ލާޒިމްކުރާ ބައްދަލުވުމެކެވެ.

މި ބައްދަލުވުމަކީ މާލެ ސިޓީގައި ހުރި އެކި ކަންކަމާ ގުޅޭ ގޮތުން އާންމުންނަށް، މޭޔަރާ ސުވާލުކޮށް، ކަންބޮޑުވުން ފާޅުކޮށް އަދި ހިޔާލު ހުށަހެޅޭ ގޮތަށް ބާއްވާ ބައްދަލުވުމެކެވެ. 

މިރޭގެ ރައްޔިތުންގެ ބައްދަލުވުން ބާއްވަން ނިންމާފައި ވަނީ މިރޭ 20:30 ގައި ލޮނުޒިޔާރަތް ޕާކުގައެވެ. މި ބައްދަލުވުމުގައި މާލެ ސިޓީގެ، ވީހާވެސް ގިނަ ބަޔަކު ބައިވެރިވުމަށް ސިޓީ ކައުންސިލުން ވަނީ އެދިފައެވެ.

އާންމުންގެ ސުވާލުތަކާއި، ކަންބޮޑުވުންތައް އެހުމުގެ އިތުރުން، މި ބައްދަލުވުމުގައި ސިޓީ ކައުންސިލުގެ އެކި މަސައްކަތްތަކުގެ މައުލޫމާތު ވެސް ދޭނެއެވެ.