ސްޕްރީމް ކޯޓުގެ ނިންމުމާއި އެކު، ބަންޑާރަ ނައިބުގެ ޤާނޫނީ ލަފަޔަކަށް އެދިވަޑައިގެންފައިވާ ކަމުގައި، ރައީސުލްޖުމްހޫރިއްޔާ ޑރ، މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އެމަނިކުފާނު ތަސްދީޤު ނުކުރައްވައި އަނބުރާ ފޮނުވާލެއްވި އިންތިޚާބުތަކާއި ބެހޭ ޢާއްމު ޤާނޫނަށް އިސްލާޙް ގެނައުމުގެ ބިލް އެއްވެސް ބަަދަލެއް ނުގެނެސް އިއްޔެ ރައްޔިތުންގެ މަޖިލީހުން އަލުން ފާސްކުރެއްވުމާއި، އަދި މަޖިލީހުގެ މެމްބަރުންގެ ޢަދަދު ގުނުމުގައި ދިވެހިރާއްޖޭގެ ސްޕްރީމްކޯޓުން މިއަދު ނިންމެވި ނިންމެވުމާއި ގުޅިގެން ދެއްކެވި ވާހަކަފުޅުގައެވެ.

އެމަނިކުފާނު އަތޮޅުތަކަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު މެންދުރުކުރީގައި، ނ ކެނދިކުޅުދޫގައި އެރަށު ރައްޔިތުންނާއި ބައްދަލުކުރައްވައި ރައީސުލްުޖުމްހޫރިއްޔާ ދެއްކެވި ވާހަފުޅުގައި ވިދާޅުވީ، ރައްޔިތުންގެ މަޖިލީހުގެ އަދަދަކީ، 80 މެމްބަރުން ކަމަށް ބަލައިގެން ނިންމާ ކޮންމެ ނިންމުމެއް ގާނޫނޫ އަސާސީއާ ހިލާފު ވާނެކަމަށާއި، މަޖިލީހުގެ އަދަދަކީ 87 ކަމަށް ސުޕްރީމް ކޯޓުން ނިންމާފައިވާކަމަށެވެ. އެހެންވެ އެކަމުގައި ބަންޑާރަ ނައިބުގެ ގާނޫނީ ލަފަޔަކަށް މިހާރު ވާނީ ދަންނަވާފައިކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރޯދަމަހު ރައްޔިތުންގެ މަޖިލީހުގެ އިންތިޚާބު ނުބޭއްވުމަށް އާއްމު އިންތިޚާބާއި ބެހޭ ޤާނޫނަށް ގެނައި އިސްލާޙުގެ ބިލް މަޖިލީހުން ދެވަނަ ފަހަރަށް ފާސްކުރުމުން އެބިލް ތަސްދީޤުކުރެއްވުން ރައީސުލްޖުމްހޫރިއްޔާގެ މައްޗަށް ލާޒިމް ވާނެއެވެ. އެހެން ނަމަވެސް ސަރުކާރުން ރައްޔިތުންގެ މަޖިލީހުގެ އިންތިޚާބު ފަސްކުރަން ބޭނުން ނުވަނީ، މާލީ ދަތިތަކާއި އެކު އަދި ސަރުކާރަށް ރައްޔިތުންގެ އިތުބާރު ގެއްލެމުންދާތީ ކަމުގައި އިދިކޮޅު ފަރާތްތަކުން ތުހުމަތު ކުރެއެވެ.

އިލެކްޝަންސް ކޮމިޝަނުންވެސް ފާހަގަކޮށްފައިވާ ގޮތުގައި ރޯދަމަހުގައި އިންތިޚާބު ބޭއްވުމަކީ، ވޯޓުލާން ނުކުންނަ މީހުންގެ އަދަދު މަދުވެގެން ހިނގައިދާނެ ކަމެކެވެ. އެހެން ނަމަވެސް މިހާރު މަޖިލީހުން ފާސްކޮށްފައިވާ ބިލް ރައީސުލްޖުމްހޫރިއްޔާ ތަސްދީޤު ނުކުރައްވާނަމަ، އިންތިޚާބު ބާއްވާ ތާރީޚަށް ބަދަލު ގެނައުމަކީ ޤާނޫނީ ގޮތުން ވާން އޮތް ކަމެއް ނޫންކަން އެކޮމިޝަނުގެ މެމްބަރުން ކުރިންވެސް ފާހަގަކުރައްވާފައިވެއެވެ.

އިއްޔެ ބޭއްވި އެމްޑީޕީގެ ޕާލެމްޓްރީ ގުރޫޕުގެ ނޫސްވެރިންގެ ބައްދަލުވުމުގައި، ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު ޙިސާން ޙުސައިން ވިދާޅުވީ، ރައީސުލްޖުމްހޫރިއްޔާ، މަޖިލީހުން ދެވަނަފަހަރަށްވެސް ބިލް ފާސްކުރުމުން އެބިލް ތަސްދީޤު ނުކުރައްވާނަމަ އެކަން ވާނީ އެމަނިކުފާނު ޤާނޫނު އަސާސީއާަ ޚިލާފަށް ކުރައްވާ ކަމަށެވެ. އަދި އެކަމާއި މެދު ދެން އަމަލުކުރާނެ ގޮތެއް ނިންމާނީ އެޕާޓީގެ ޕާލަމެންޓްރީ ގްރޫޕުން ކަމުގައިވެސް ޙިސާން ވިދާޅުވިއެވެ.

ރައީސުލްޖުމްހޫރިއްޔާ މަޤާމުން ޢަޒުލްކުރުމަށް ބޭނުންވާ ސޮއެ ހަމަކޮށް އެމްޑީޕީން އޮތީ އެމައްސަލަ ކޮންމެ ވަގުތެއްގައިވެސް މަޖިލީހަށް ވެއްދޭނެ ގޮތަށް ތައްޔާރުވެގެންނެވެ.