ރަައީސުލްޖުމްހޫރިއްޔާ ތަސްދީޤު ނުކުރައްވައި އަނބުރާ ފޮނުއްވާލައްވާ ބިލެއް މަޖިލީހުން ދެވަނަ ފަހަރަށް ފާސްކުރައްވައިފިނަމަ، ލަސްކުރުމެއްނެތި އެބިލެއް ރައީސުލްޖުމްހޫރިއްޔާ ތަސްދީޤުކުރައްވަން ޖެހިވަޑައިގަންނަވާނެކަން 2010 ވަނަ އަހަރު، ދިވެހިރާއްޖޭގެ ސްޕްރީމްކޯޓުން ނިންމަވާފައިވާކަން ޤާނޫނީ ބޭފުޅުން އަލުން ހަނދާންކޮށްދެއްވައިފިއެވެ.

ރޯދަމަހު އިންތިޚާބު ނުބާއްވާ ގޮތަށް އާއްމު އިންތިޚާބާއި ބެހޭ ޤާނޫނަށް އިސްލާޙް ގެނައުމުގެ ބިލް މަޖިލީހުން މިއަދު ދެވަނަ ފަހަރަށް އަލުން ފާސްކުރެއްވުމާއި އެކު، ރައީސުލްޖުމްހޫރިއްޔާ އެބިލް ތަސްދީޤު ކުރައްވައިފާނެތޯ ވަނީ ސުވާލު އުފެދިފައެވެ. އެކަމާއި ގުޅޭ ގޮތުން ރައީސުލްޖުމްހޫރިއްޔާގެ ފަރާތްޕުޅުން އަދި އެއްވެސް ވާހަކަފުޅެއް ދައްކަވާފައެއް ނުވެއެވެ.

ކުރީގެ ބަންޑާރަ ނައިބު އިބްރާހީމް ރިއްފަތު އެކްސްގައި ކުރެއްވި ޕޯސްޓެއްގައި ވިދާޅުވީ، 2010 ގައި މިފަދަ ހާލަތެއް މެދުވެރިވެ އޭރުގެ ސުޕްރީމް ކޯޓުން ނިންމާފައިވާ މައްސަލަަގައި،7 ފަނޑިޔާރުންގެ އިއްތިފާޤުން ކަނޑައަޅާފައިވަނީ '"…އިންސާނީ ބާރުނުފޯރާފަދަ، އިޚްތިޔާރުން ބޭރު ސަބަބެއް މެދުވެރިވެގެން މެނުވީ" ލަސްކުރުމަކާ ނުލައި ރައީސް އެބިލެއް ތަސްދީޤުކުރައްވަންވާނެކަމަށް ކަމުގައެވެ.

ކުރީގެ ރައީސް، މުޙައްމަދު ނަޝީދުގެ ވެރިކަމުގައި، އެމަނިކުފާނު ވަނީ، ރައްޔިތުންގެ މަޖިލީހުން މާލިއްޔަތުގެ ޤާނޫނަށް ގެނައި އިސްލާޙެއް ތަސްދީޤު ނުކުރައްވައި އަނބުރާ މަޖިލީހަށް ފޮނުއްވާ ލެއްވުމަށްފަހުގައި އަލުން މަޖިލީހުން އެބިލް ފާސްކުރުމުންވެސް ތަސްދީޤު ނުކުރައްވައި ހިފަހައްޓަވާފައެވެ. އެމައްސަލައިގައި އޭރުގެ އިދިކޮޅު ފަރާތްތަކުން، ދިވެހިރާއްޖޭގެ ސްޕްރީމްކޯޓަށް ހުށައެޅި މައްސަލައިގައި، 10 ޑިސެމްބަރު 2010ގައި ކުރެއްވި ޙުކުމްގައި ބުނެފައި ވަނީ، ލަސްކުރުމަކާއި ނުލައި ރައީސުލްޖުމްހޫރިއްޔާ ބިލް ތަސްދީޤުކުރައްވަން ވާނެ ކަމަށެވެ.

މިމައްސަލައިގައި އެމްޑީޕީގެ ޕާލަމެންޓްރީ ގުރޫޕްގެ ފަރާތުން ބޭއްވި ނޫސްވެރިންގެ ބައްދަލުވުމުގައި ޤާނޫނީ ވަކީލު އަދި ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު ޙިސާން ޙުސައިން ވިދާޅުވީ، ރައީސުލްޖުމްހޫރިއްޔާ ބިލް ތަސްދީޤު ނުކުރައްވައި ލަސްކުރައްވައިފިނަމަ އެކަން ވާނީ އެމަނިކުފާނު ޤާނޫނު އަސާސީއާ ކަނޑައެޅިގެން ޚިލާފުވެވަޑައިގެންނެވުމުގެ އަމަަލަކަށް ކަމަށެވެ.