ރާއްޖޭގައި ފާނަބަސަންދު ނުވަތަ ޗިކަންޕޮކްސް ފެތުރޭތީ ރައްކާތެރިވާން ހެލްތު ޕްރޮޓެކަޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.

އެޗްޕީއޭއިން ވިދާޅުވީ، މިދިޔަ އަހަރުގެ ފުރަތަމަ ދެ މަހާ އަޅާ ބަލާއިރު މި އަހަރުގެ މިހާތަނަށް ފާނަބަސަންދު ޖެހިގެން ރިޕޯޓް ކޮށްފައިވާ މިންވަރު އިތުރު ކަމަށެވެ. އެގޮތުން މިދިޔަ މަހު 228 ކޭސް ރިޕޯޓް ކޮށްފައި ވާއިރު މި މަހުގެ މިހާތަނަށް 215 ކޭސް ރިޕޯޓު ކޮށްފައިވެއެވެ.

ފާނަބަސަންދު ކޭސްތައް އެންމެ ގިނައިން ރިޕޯޓްކޮށްފައި ވާނީ މާލެ ސަރަހައްދުގެ އިތުރުން ފ. އަތޮޅުން ކަމަށް ވެސް އެޗްޕީއޭ އިން ވަނީ ހާމަކޮށްފައެވެ.

ފާނަބަސަންދުގެ އަލާމާތްތަކަކީ ކޮބާ؟

- ހުން އައުން

- ވަރުދެރަވުން

- ނޭފަތުން ފެން އައުން

- ހަމުގައި ފެންއަރާފައި ހުންނަ ބިހިތަކެއް ނެގުން

- ކާހިތް ނުވުން /ބޮލުގައި ރިއްސުން/ ކެއްސުން/ ކަރަށް ތަދުވެ، ބަނޑުގައި ރިއްސުން

މި ބައްޔަކީ ގައިންގަޔަށް އަރާ ބައްޔަކަށްވާތީ ބަލިޖެހިފައިވާ މީހަކު ކެއްސައި، ކިނބިހި އަޅާއިރު ނޭވާލާ ނިޒާމުން ވެސް މި ބަލި ފެތުރުމުގެ ފުރުސަތު އޮވެއެވެ. އަދި ބިހި ނަގާފައި ހުރި މީހެއް ގައިގައި ބީހުމުން ނުވަތަ ބަލި ޖެހިފައިވާ މީހަކު ބޭނުންކޮށްފައިވާ ތުވާލި ފަދަ އެއްޗެއް ބަލި ޖެހުމުގެ ފުރުސަތު ބޮޑެވެ.

ފާނަބަސަންދު ޖެހިއްޖެ ނަމަ ގޭގައި އުޅޭ އެހެން މީހުންނާ އެކަހެރިވުމާއި ގެއިން ބޭރަށް ނުދިޔުމާއި ވެކްސިން ޖެހުމަށް އެޗްޕީއޭއިން ވަނީ އެދިފައެވެ.