ރައީސުންގެ ރަސްމީ ގެކޮޅު، މުލިއާގެ މަރާމާތުކުރެވެންދެން އަމިއްލަ ގެކޮޅު، ދިމްޔާތުގައި މަޑުކުރައްވަން ޖެހިވަޑައިގަތް މުއްދަތުގައި ދައުލަތުގެ ބަޖެޓުން އެންމެ ރުފިޔާއެއް ވެސް ހޭދަނުކުރައްވާ ކަމަށާއި ހުރިހާ ހަރަދެއް ކުރެއްވީ އަމިއްލަފުޅަށް ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ. ރައީސް މިކަން ހާމަކުރެއްވީ "ރައީސްގެ ޖަވާބު" ޕްރޮގްރާމުގައި ށ. ފުނަދޫ، ނީލްވިލާ، އާމިނަތު ނަޖްމާ ކުރި ސުވާލަކަށް ޖަވާބުދެއްވަމުންނެވެ.

ނަޖުމާ ސުވާލުކޮށްފައިވަނީ ރައީސް އަމިއްލަ ގެކޮޅުގައި ހުންނެވި ދުވަސްތަކަށް ދައުލަތުން ބޮޑެތި ޚަރަދުތަކެއް ކުރި ކަމަށް ދެކެވޭ ވާހަކަތަކާ ގުޅޭގޮތުންނެވެ. ދިމްޔާތުގައި ހުންނެވި މުއްދަތުގައި ދައުލަތުން 25 މިލިއަން ރުފިޔާ ހޭދަކުރި ކަމަށް ދެކެވޭ ވާހަކަތަކަށް ރައްދު ދެއްވައި ރައީސް ވިދާޅުވީ އެއީ ކަނޑައެޅިގެން ދޮގު ވާހަކަތަކެއް ކަމަށެވެ. ރައީސުލްޖުމްހޫރިއްޔާ ހުންނެވުމުގެ ޚަރަދު ދައުލަތުން ކުރާގޮތަށް އޮތް ނަމަވެސް އެމަނިކުފާނު ބޭނުންފުޅުވީ އަމިއްލަ ގެކޮޅުގައި ހުންނެވި މުއްދަތުގައި ހުރިހާ ޚަރަދެއްވެސް އަމިއްލަފުޅަށް ކުރެއްވުމަށް ކަމަށް ރައީސް ވިދާޅުވިއެވެ. 

މީގެ އިތުރުން އެމަނިކުފާނާއި އަނބިކަނބަލުން ސާޖިދާ މުހައްމަދުގެ ފަރީއްކުޅުވުމުގެ ޚަރަދަށް 100 ދުވަހުގެ ތެރޭގައި 30 މިލިއަން ރުފިޔާ ދައުލަތުން ޚަރަދު ކުރިކަމަށް ބުނެ ދެކެވޭ ވާހަކަތައް ދޮގުކުރައްވައި ރައީސް ވިދާޅުވީ އެއީ ބުއްދި ގަބޫލުކުރާ ވާހަކައެއް ނޫންކަމަށެވެ. އެގޮތުން، މުލިއާގޭގައި ކެއުމުގެ ޚަރަދަށް ވެސް އަހަރަކު ހޭދަކުރަން ޖެހެނީ ހަތްލައްކަ ރުފިޔާ ކަމަށާއި އެފަދަ ހަގީގަތާ ޚިލާފު ޚަބަރު ފަތުރަނީ ސަރުކާރާ ދެކޮޅަށް ދައްކާނެ އިތުރު ވާހަކައެއް ނެތުމުން ކަމަށެވެ.

މިފަހަކަށް އައިސް ހަގީގަތާ ޚިލާފު ޚަބަރުތައް ފެތުރުން އިތުރުވެފައިވާކަމަށް ރައީސް ވިދާޅުވިއެވެ. ރައީސް މިހެން ވިދާޅުވެފައިވާއިރު މިއީ ހަެަދު ބޮޑު ސަރުކާރެއްކަމަށް ގިނަ ބަޔަކު ގަބޫލުކުރެއެވެ. އަދި ސަރުކާރުން ގިނަބަޔަކު ދަނީ ފާޑުކިޔަމުންނެވެ. މި ސަރުކާރު ވެރިކަމާއި ހަވާލުވިއިރު ދައުލަތުގެ މާލީ ހާލަތު އޮތީ ވަރަށް ދަށްކޮށްކަމަށް ސަރުކާރުގެ އިސްފަރާތްތަކުން ބުނަމުންދާއިރު އެފަދަ ހާލަތެއްގައި ދައުލަތް އޮތްނަމަ މިފަދަ ހަރަދުތައް ކުރެވޭނެކަމާއިމެދުވެސް ގިނަ ބަޔަކު ދަނީ ސުވާލު އުފައްދަމުންނެވެ.