ހިޖާބު ސްޓައިލްސް: ކޮޓޮން ޝޯލް ސްޓައިލް ފޯ އެވްރިޑޭ
'ޗާލު' ޕްރޮގްރާމަކީ 'ނޫން.ޑޮޓް.އެމް.ވީ' އިން އެކްސްކުލޫސިވް ކޮށް ގެނެސްދޭ ލައިފް ސްޓައިލްސް އަށް ހާއްސަ ޕްރޮގްރާމެކެވެ. މަޝްހޫރު މޭކަޕް އާޓިސްޓު ރިޒްނާ އަހުމަދު ހޮސްޓު ކޮށްދޭ މި ޕްރޮގްރާމްގެ ފުރަތަމަ ސެގްމަންޓުގައި ހިމެނޭ ވީޑިއޯތައް ހާއްސަކޮށްލާފައިވަނީ އެކިއެކި މުނާސަބާތަކާއި ގުޅުވައިގެން އަމިއްލައަށް ގޭގައިވެސް ވަރަށް ރީއްޗަށް ހިޖާބު އެޅިދާނެ ސްޓައިލްތަކަކަށެވެ. އެގޮތުން، ދެވަނަ ވީޑިއޯގައި ހިޖާބު ސްޓައިލް ގެނެސްދިނުމަށް ބައިވެރިވެފައިވަނީ ކްލެރިސާ މޯލްޑިވްސް އިންނެވެ.
ކްލެރިސާ މޯލްޑިވްސް އަކީ ދެ އަންހެން އާޓިސްޓުން 2011 ވަނަ އަހަރު ފެށި މަސައްކަތެކެވެ. މި މަސައްކަތް އިތުރަށް ފުޅާވެ، ފަހުން ވަނީ މޮޑެސްޓު ކްލޯތިންގ ބްރޭންޑަކަށް ބަދަލުވެފައެވެ. މި ވީޑިއޯގައި މުޅިން އައު ހިޖާބު ސްޓައިލެއް ގެނެސްދިނުމަށް ކްލެރިސާ މޯލްޑިވްސްގެ ފަރާތުން ބައިވެރިވަނީ ނިއުމާއެވެ. ނިއުމާ ގެނެސްދޭ ސްޓައިލަކީ ކޮޓޮން ޝޯލެއް ބޭނުންކޮށްގެން އާއްމު ދިރިއުޅުމުގައި ކޮންމެ ދުވަހަކު ވެސް އަޅާލެވިދާނެ ކަހަލަ ސްޓައިލެކެވެ. މި ވީޑިއޯގައި މޮޑެލްއެއްގެ ގޮތުގައި ބައިވެރިވެފައިވަނީ ޓިކްޓޮކްގައި މަޝްހޫރު ތަރިއެއް ކަމުގައިވާ އުޝީއެވެ.
ކޮޓޮން މެޓީރިއަލްގެ ޝޯލްއެއް މި ހިޖާބު ސްޓައިލިންގ އަށް ބޭނުންކޮށްލީ ކީއްވެތޯ އެހުމުން، ނިއުމާ ބުނީ ކްލެރިސާ އިން ލިބޭ މި ޝޯލަކީ ސައިޒް ބޮޑު، މޮޑެސްޓުކޮށް އަޅަން ބޭނުންވާ ކުދިންނަށް ވެސް ފަސޭހައިން އެޅޭނެ މެޓީރިއަލްއެއް ކަމަށެވެ. އަދި އާއްމުކޮށް އަޅައިގެން އުޅޭއިރު ވެސް މިއީ ވަރަށް ފަސޭހަ، ކޮމްފޮޓެބަލް މެޓީރިއަލްއެއް ކަމުގައި ނިއުމާ ބުންޏެވެ. މި ސްޓައިލް އަކީވެސް ވަރަށް ޗާލު، ހިޖާބު އަޅުއްވާ ފަރާތްތަކުން ޓްރައިކޮށްލަން ރަނގަޅު ސްޓައިލެކެވެ.