Advertisement
ފޮޓޯ: ދިވެހި ފުލުހުންގެ ހިދުމަތް
މަޖިލިސް އިންތިހާބަށް ފުލުހުންގެ ކޮމާންޑަރުން ތަމްރީންކުރަން ފަށައިފި
މާރޗް މަހުގެ 17ގައި ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބުގައި މަސައްކަތްކުރާ ފުލުހުންގެ ކޮމާންޑަރުން ތަމްރީނުކުރަން ފަށައިފިއެވެ.
މި ތަމްރީނުތައް ކުރިއަށް ގެންދަނީ ދިވެހި ފުލުހުންގެ ޚިދުމަތާއި އިލެކްޝަންސް ކޮމިޝަން ގުޅިގެންނެވެ. ފުލުހުން ވިދާޅުވީ މި ތަމްރީނުތަކުގެ ތެރެއިން މަޖިލިސް އިންތިޚާބާ ބެހޭ ޤާނޫނާއި އިންތިޚާބުތަކާ ބެހޭ ޢާންމު ޤާނޫނާއި އިލެކްޝަންސްގެ ޤާނޫނަށް އަހުލުވެރިކުރުވުމަށް މަޢުލޫމާތު ހިއްސާކުރައްވާނެ ކަމަށެވެ.
ކުރީގެ އިންތިޚާބުތަކުގެ މަޢުލޫމާތާއި ވޯޓުލުމާއި ވޯޓު ގުނުމުގެ ހުރިހާ މަރުހަލާއެއްގައި އަމާންކަމާއެކު ހަރަކާތްތެރިވެފައިވާ ގޮތުގެ ތަޖުރިބާތަކާއި މަޢުލޫމާތު މި ތަމްރީނު ޕްރޮގުރާމުގައި ހިއްސާކުރައްވާނެކަމަށް ވެސް ފުލުހުން ވިދާޅުވިއެވެ. އަދި ކުރީ އިންތިޚާބުތަކުގައި ދިމާވެފައިވާ މައްސަލަތަކާއި ވޯޓުލުމުގެ ޙައްޤު އޮންނަ ކޮންމެ ރައްޔިތަކަށް އެ ޙައްޤުގެ ބޭނުން އެންމެ ފުރިހަމައަށް ކަށަވަރުކޮށްދިނުމާ ގުޅޭގޮތުންވެސް މަޢުލޫމާތު ހިއްސާކުރައްވާނެކަމަށް ވެސް ފުލުހުން ވިދާޅުވިއެވެ.
މި ޕްރޮގްރާމްގައި މަޢުލޫމާތު ދެއްވަނީ މި ޚިދުމަތުގެ މުދައްރިބުންނާއި އިލެކްޝަންސް ކޮމިޝަނުގެ ކަމާގުޅޭ މުދައްރިބުންކަމަށް ފުލުހުން ވިދާޅުވެއެވެ.
