ދިވެހި ރައްޔިތުން ގޮވަމުން ދަނީ މިސްރާބު ހަމަމަގަށް އެޅުވުމަށް ކަމަށާއި، މަޖިލިސް އިންތިޚާބުގައި އެމްޑީޕން ނުކުތީ ޤައުމު ހަމަ މަގަށް އެޅުވުމަށްޓަކައި ކަމުގައި އެމްޑީޕީގެ ރައީސް އަދި އެމްޑީޕީ ސަރުކާރުގެ ފޮރިން މިނިސްޓަރ ޢަބުދުﷲ ޝާހިދު ވިދާޅުވެއްޖެއެވެ.

ޝާހިދު މިހެން ވިދާޅުވީ، އެމްޑީޕީން އެޕާޓީގެ ރަސްމީ ކެމްޕޭން ލޯންޗު ކުރުމަށް ރޭ އާޓިފިޝަލް ބީޗުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ. 

ޢަބުދުﷲ ޝާހިދު ވިދާޅުވީ، މިއަދު އެމްޑީޕީން ނުކުމެ އޮތީ ދިވެހި ރައްޔިތުން ގޮވާ ގޮވުން އެނގިގެން ކަމަށެވެ. އަދި ރައްޔިތުން ގޮވަމުންދާ ގޮވެއްޔަކީ، މިސަރުކާރުގެ މިސްރާބު ހަމަމަގަށް އަޅުވައިދިނުމަށް ގޮވާ ގޮވުން ކަމަށެވެ.

މީގެ ކުރިންވެސް ޢަބުދުﷲ ޝާހިދު އެމަނިކުފާނުގެ ވާހަކަފުޅުގައި ތަކުރާރު ކުރައްވާ ފަދައިން ރޭ ވެސް ވިދާޅުވީ، މިސަރުކާރު އުފެދިގެން އައީ ރައްޔިތުންގެ މެދުގައި ދޮގުވާހަކަތަކާއި ފިތުނަވެރި ވާހަކަތައް ފަތުރައިގެން ކަމަށެވެ. އަދި ވެރިކަމުގެ ފުރަތަމަ 100 ދުވަސް ނިމިގެން ދިޔައިރު ރައްޔިތުންނަށް އެކަން އެނގި ހާމަވެފައިވާ ކަމުގައިވެސް ޝާހިދު ވިދާޅުވިއެވެ.

ޢަބުދުﷲ ޝާހިދު ވިދާޅުވީ، ސަރުކާރުން ހަދަމުންދާ ދޮގުތައް ރައްޔިތުންނަށް އެނގި ހާމަވެ، ފުދިއްޖެ ކަމުގައި ރައްޔިތުން އަންނަނީ ބުނަމުން ކަމަށެވެ. 

ޢަބުދުﷲ ޝާހިދުގެ ވާހަކަފުޅުގައި ވަނީ، މިސަރުކާރުގައި ރާއްޖޭގެ އިޤުތިޞާދީ ޙާލަތު ދަށަށް ގޮސް ދޭދޭ ޤައުމުތަކާއި އެކު އޮތް ޚާރިޖީ ގުޅުންތައް ކެނޑިގެން ގޮސް، މީގެ ކުރިން ޤައުމު ވެއްޓިފައި ނުވާފަދަ ދަރަޖައަކަށް، ޤައުމު ވެއްޓިފައިވާ ކަމަށެވެ.

އެމްޑީޕީން ރޭ ބޭއްވި މަޖިލިސް އިންތިޚާބުގެ ކެމްޕޭން ލޯންޗު ކުރުމުގެ ޖަލްސާގައި އެޕާޓީން ވަނީ، ކެންޑިޑޭޓުން ތަޢާރަފްކޮށް ރަސްމީކޮށް ކެމްޕޭން ފެށިކަން އިޢުލާނުކޮށްފައެވެ.