ފުރަތަމަ ފަހަރަށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އަށް ރައްޔިތުންގެ މަޖިލީހުގެ މެޖޯރިޓީ ލިބުނު 19 ވަނަ މަޖިލީހުގައި އެ ޕާޓީއިން ފާސްކޮށްފައިވާނީ ރައްޔިތުންނަށް ލާބައާއި މަންފާކުރާނެ ގާނޫނުތަކެއްކަމަށް، ހިންނަވަރު ދާއިރާގެ މެމްބަރު ޖީހާން މަޙްމޫދު ވިދާޅުވެއްޖެއެވެ. ޖީހާން މިހެން ވިދާޅުވީ، އެމްޑީޕީގެ މަޖިލިސް ކެމްޕޭން  ފެށުމުގެ ގޮތުން "މިސްރާބު ހަމަމަގަށް" މިނަމުގައި އާޓިފިޝަލް ބީޗުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

ޖީހާންގެ ވާހަކަފުޅުގައި ޕީޕީއެމްގެ މެޖޯރިޓީ އޮތް 18 ވަނަ މަޖިލީހާއި، އެމްޑީޕީގެ މެޖޯރިޓީ އޮތް 19 ވަނަ މަޖިލީހުގެ މަސައްކަތްތަކުގައި ހުރި ފަރަގަށް އަލިއަޅުވާލެއްވިއެވެ. ޖީހާން ވިދާޅުވީ، އެ ދެ ދައުރުން ފެނިގެންދާނީ، ބާރުވެރިކަމާ، ބިރުވެރިކަމާ އޮތް ފަރަގު ކަމުގައެވެ. އެގޮތުން 18 ވަނަ މަޖިލީހުގެ މަސައްކަތްތައް ބައްޓަންކޮށްފައި އޮތީ ސަރުކާރު ބާރުވެރިކުރުވުމަށް ކަމަށާއި، އެޔާ ޚިލާފަށް 19 ވަނަ މަޖިލީހުގެ މަސައްކަތްތައް ބައްޓަންކޮށް ކުރިޔަށް ގެންދިޔައީ ރައްޔިތުން ބާރުވެރި ކުރުވުމަށް ކަމުގައި ވިދާޅުވިއެވެ. 

މި ފަރަގު ތިލަކޮށްދިނުމަށް މިސާލު ޖައްސަވަމުން ޖީހާން ވިދާޅުވީ، ސަރުކާރު ބާރުވެރި ކުރުވުމަށް 18 ވަނަ މަޖިލީހުން އަބުރުގެ ގާނޫނާއި، ޓެރަރިޒަމްގެ ގާނޫނުތައް ފަދަ ގާނޫނުތަކާއެކު ރައްޔިތުންގެ އެތައް މިނިވަންކަމެއް ނިގުޅައިގަނެ، އެމްޑީޕީގެ އެތައް މެމްބަރުންނަކަށް ނުހައްގުން އަނިޔާ ދިން ކަމަށެވެ. ނަމަވެސް އެމްޑީޕީގެ މެޖޯރިޓީ އޮތް 19 ވަނަ މަޖިލީހުން ފާސްކުރި ގާނޫނުތަކުގެ ތެރޭގައި، ކުޑަކުދިންގެ ހައްގުތަކުގެ ގާނޫނު، ކުޑަކުދިންގެ އަދުލުގެ ގާނޫނު، މިނިމަމް ވޭޖް، ސާވިސް ޗާޖު ލާޒިމްކުރުން، ތައުލީމުގެ ގާނޫނު، މަތީ ތައުލީމުގެ ގާނޫނު، އާމްދަނީގެ ޓެކްސް، މަސްވެރިކަން، ފެނާއި ނަރުދަމާގެ ގާނޫނު، އިންޑަސްޓްރިއަލް ރިލޭޝަންސް ބިލް އަދި ޖަމްއިއްޔާތަކުގެ ގާނޫނު ހިމެނޭކަމަށް ވިދާޅުވިއެވެ.

މީގެ އިތުރުން، މިހާރުގެ ސަރުކާރުން ވެރިކަމަށް އައުމަށް ރައްޔިތުންނަށް ދޮގުހަދާ އޮޅުވާލާފައިވާކަން ފަޅާ އަރަމުން އަންނަކަމަށް ވެސް ޖީހާންގެ ވާހަކަުފުޅުގައި ފާހަގަކުރެއްވިއެވެ. އެގޮތުން، ވެންޓިލޭޓަރު މައްސަލައިގައި ދިވެހި ދައުލަތަށް ބަދަލު ދޭންޖެހޭ ގޮތަށް ހޯމަ ދުވަހު ނިމިގެން ދިއުމުގެ މާނައަކީ، ވެންޓިލޭޓަރު ވައްކަމޭ ކިޔައިގެން ދެކެވުނު ވާހަކައަކީ ހަގީގަތެއް ނޫންކަމަށެވެ.

މީގެ އިތުރުން، ޗާގޯސް މައްސަލައާ ގުޅިގެން އެޓާނީ ޖެނެރަލް އޮފީހުން ހޯމަ ދުވަހު ނެރުނު ބަޔާނުން ދޭހަވަނީ، ކަނޑު ވިއްކާލީއޭ ކިޔައިގެން ދެއްކި ވާހަކައަކީ ވެސް ދޮގު ވާހަކައެއް ކަމަށް ޖީހާން ވިދާޅުވިއެވެ. އެ މައްސަލާގައި ރައީސް ޞާލިޙްގެ ސަރުކާރުން ބުނަމުން ދިޔައީ އެއީ ދިވެހިރާއްޖެއަށް އިޓްލޮސްގައި އެޕީލް ކުރެވޭނެ މައްސަލައެއް ނޫންކަމަށެވެ. އަދި އޭޖީއިން ނެރުނު ބަޔާނުގައި ވެސް އޮތީ އެހެންނެވެ.

މި ހުރިހާ ކަމަކަށް ރިއާޔަތްކޮށް، އެމްޑީޕީއަށް ވިހި ވަނަ މަޖިލީހުގެ މެޖޯރިޓީ ދިނުމަށް ޖީހާން ވަނީ ރައްޔިތުންގެ ކިބައިން އެދިވަޑައިގެންފައެވެ.