ރާއްޖެ އިތުރު އަނދަވަޅަކަށް ވައްޓާ ނުލާ އަދިވެސް ހިފެހެއްޓޭނީ ރައްޔިތުންގެ މަޖިލީހުގެ މެޖޯރިޓީ އެމްޑީޕީއަށް އޮވެގެން ކަމުގައި އެމްޑީޕީގެ ޗެއާ ޕާރސަން ފައްޔާޒް އިސްމާޢީލް ވިދާޅުވެއްޖެއެވެ.

ފައްޔާޒް މިހެން ވިދާޅުވީ، އެމްޑީޕީގެ މަޖިލިސް ކެމްޕޭންޝިއާރު "މިސްރާބު ހަމަަގަށް" މި ޝިއާރުގެ ދަށުން މިރޭ ބޭއްވި މަޖިލިސް ކެމްޕޭން ލޯންޗު ކުރުމުގެ ޖަލްސާގައި ވާހަކަފުޅު ދައްކަވަމުންނެވެ.

ފައްޔާޒު ވިދާޅުވީ، މިއަދުވެސް ސަރުކާރަށް އަނިޔާވެރިކަމަށް ދާން ނުކެރިގެން އެއުޅެނީ އެމްޑީޕީ އަތުގައި މެޖޯރިޓީ އޮތީމާ ކަމަށެވެ.

ފައްޔާޒް ވިދާޅުވީ އެމްޑީޕީގެ ފުރަތަމަ ސަރުކާރުގައި ރައްޔިތުން ކުރިޔަށްލާ ރައްޔިތުންގެ ހައްޤުގައި ގިނަ މަސައްކަތްތަކެއް ކުރެވުނު ކަމަށެވެ. އެހެން ނަމަވެސް އެސަރުކާރު ވައްޓާލީ ރައްޔިތުންގެ ތެރޭގައި އަނިޔާވެރިކަން ޤާއިމްކުރުމަށް ބޭނުންވާ ބައެއް ކަމުގައެވެ.

ފައްޔާޒް ވިދާޅުވީ، 2013އިން 2018އަށް އުފެދުނު ވެރިކަމަކީ، ވޯޓު އޮޅުވާލައިގެން އުފެދުނު ސަރުކާރެއް ކަމަށް ދެކެވަޑައިގަންނަވާ ކަމަށާއި އެއީ މިހާތަނަށް ފެނުނު އެންމެ އަނިޔާވެރި ސަރުކާރު ކަމަށެވެ. އެހެން ނަމަވެސް އެކަން ގިނަ ބަޔަކު ހަނދާން ނެތިއްޖެ ކަމަށާއި، އެކަމުގެ ސަބަބަކީ، 2018 ވަަނަ އަހަރު އުފެދިގެން ދިޔަ އެމްޑީޕީގެ ސަރުކާރާއި އެކު ޤާއިމްވި ހެޔޮވެރިކަން ކަމުގައި ފައްޔާޒް ވިދާޅުވިއެވެ.

ފައްޔާޒް ވިދާޅުވީ، ވެރިކަން ބަދަލުވެގެން ދިޔައީ އެމްޑީޕީގެ އެތެރޭގަައި ހިނގައި ދިޔަ ކަންތައްތަކުގެ ސަބަބުންނާއި، މިސަރުކާރުގެ ވެރިން ދޮގާއި ފިތުނަވެރި ވާހަކަތައް ފަތުރައި ކުރި މަސައްކަތް ތަކުގެ ސަބަބުން ކަމަށެވެ. 

ފައްޔާޒު ވިދާޅުވީ، ޕީޕީއެމް ޕީއެންސީގެ ވެރިކަމެއް އައިސްފިނަމަ އަނެއްކާވެސް ކުރީގައި އޮތް ފަދަ އަނިޔާވެރި ވެރިކަމެއް ޢިއާދަ ވެދާނެ ކަމުގެ ކޮޅުމަތި ފެންނަމުންދާ ކަމުގައި، ރިޔާސީ އިންތިޚާބުގެ ކެމްޕޭނުގެ ތެރޭގައިވެސް ދަންނަވާފައި ވާނެ ކަމަށެވެ.

ފައްޔާޒް ވިދާޅުވީ، ޑިމޮކްރެޓިކް ހަމަތައް ޤަބޫލު ނުކުރާ ބަޔަކަށް ޑިމޮކްރެޓިކް ވެރިކަމެއް ކުރެވޭނެ ކަމަށް ޤަބޫލު ނުކުރެވޭނެ ކަަމަށެވެ. އަދި މިސަރުކާރަށް 3 މަސްދުވަސް ވެގެން ދިޔައިރު، ފެންނަމުން މިދަނީ އެމަގަށް (އަނިޔާވެރި ކަމަށް) ދާތަން ކަމަށާއި، ވެރިކަމަށް 100 ދުވަސް ވީއިރު 300 ދޮގު ހަދައިފި ކަމުގައިވެސް ފައްޔާޒު ވިދާޅުވިއެވެ.

19 ވަނަ ރައްޔިތުންގެ މަޖިލިސް އިންތިޚާބުގައި އެމްޑީޕީން ސުޕަ މެޖޯރިޓީ ހޯދި އިރު، މިހާރުވެސް ރައްޔިތުން މަޖިލީހުގައި 43 މެމްބަރުންނާއި އެކު މަޖިލީހުގެ މެޖޯރިޓީ ޕާޓީއަކީ އެމްޑީޕީއެވެ.