ރައްޔިތުންގެ މަޖިލީހުންގެ އިންތިޚާބުގައި، ވާދަކުރައްވާ އެމްޑީޕީގެ ކެންޑިޑޭޓުން، މަޖިލީހަށް އިންތިޚާބު ވުމަށްފަހުގައި، ޕާޓީގައި ދެމި ތިބުމަށް ވަޢުދުވެ ވީ ޢިޤުރާރާއި އެކު، އެމްޑީޕީގެ ރަސްމީ މަޖިލިސް ކެމްޕޭން މިރޭ ފަށައިފިއެވެ.

"މިސްރާބު ހަމަމަގަށް" މި ޝިއާރުގެ ދަށުން މިރޭ، އެމްޑީޕީގެ ރަސްމީ ކެމްޕޭން ފަށާފައި ވާއިރު، މިޖަލްސާގައި އެމްޑީޕީގެ އެޑްވައިޒަރ އަދި ކުރީގެ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙާއި، އެމްޑީޕީގެ އައު ރައީސް ޢަބުދުﷲ ޝާހިދާއި، އެމްޑީޕީގެ ޗެއާޕާސަން ފައްޔާޒް އިސްމާއީލާއި، އެމްޑީޕީގެ މަޖިލިސް މެމްބަރުންނާއި އާއްމު މެމްބަރުންގެ ތެރެއިން ގިނަ އަދަދެއްގެ މެމްބަރުން ބައިވެރިވިއެވެ.

މިޖަލްސާގައި ވަނީ، ރައްޔިތުންގެ މަޖިލީހުގެ އިންތިޚާބުގައި އެމްޑީޕީގެ ޓިކެޓްގައި ވާދަކުރާ ހުރިހާ ކެންޑިޑޭޓުން ތަޢާރަފްކޮށްފައެވެ. އަދި ކެންޑިޑޭޓުންނަށް ވާހަކަ ދެއްކުމަށް ފުރުޞަތު ދީފައިވެއެވެ.

މިޖަލްސާގައި އެމްޑީޕީގެ ކެންޑިޑޭޓުންނަށް ހުވާގެ އިޤުރާރު ލައިދެއްވީ އެޕާޓީގެ ޗެއާޕާސަން ފައްޔާޒް އިސްމާއީލެވެ. މިއީ މިގޮތަށް އިންތިޚާބެއްގައި ވާދަކުރަން ނުކުންނަ ކެންޑިޑޭޓުން އިންތިޚާބު ކާމިޔާބު ކުރުމަށްފަހުގައި ޕާޓީގައި ދެމި ތިބުމަށް މިގޮތަށް އާއްމުޖަލްސާއެއްގައި ވަޢުދުވެ އިޤުރާރުވި ފުރަތަމަ ފަހަރެވެ.

މިޖަލްސާގައި އެމްޑީޕީގެ އެޑްވައިޒަރު އަދި ކުރީގެ ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙްގެ ވާހަކަފުޅުގައިވެސް، އެމްޑީޕީގެ ކެންޑިޑޭޓުން އެމްޑީޕީގައި ދެމި ތިއްބެވުމަށް އެދި ވަޑައިގަތެވެ.އަދި މިހާރު ހިނގަމުންދާ މަޖިލީހަށް ހުށައެޅިފައިވާ އެންޓި ޑިފެކްޝަން ޤާނޫނު މިދައުރުގެ ތެރޭގައި ފާސްކޮށްދެއްވުމަށްވެސް އެދިވަޑައިގެންނެވިއެވެ.

19 ވަނަ ރައްޔިތުންގެ މަޖިލީހުގައި އެމްޑީޕީން ވަނީ، ތާރީޚީ ކާމިޔާބެއް ހޯދައި، މަޖިލީހުގެ ސުޕަރ މެޖޯރިޓީ ހޯދާފައެވެ. އެހެން ނަމަވެސް އެޕާޓީގެ 26 މެމްބަރަކު ވަނީ، އެމްޑީޕީ ދޫކުރައްވައި އެހެން ދެ ޕާޓީއަކާއި ގުޅިވަޑައިގެންފައެވެ.