ސަރުކާރުގެ މަސް މަސްކުންފުނި އެސްޓީއޯގެ ދަށުން ވަކިކުރުމަކީ މިސަރުކާރުން ހެދި ގޯހެއްކަމުގައި، ކުރީގެ ރައީސުލްޖުމްހޫރިއްޔާ، އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އެމްޑީޕީގެ މަޖިލިސް ކެމްޕޭން  ފެށުމުގެ ގޮތުން "މިސްރާބު ހަމަމަގަށް" މިނަމުގައި މިރޭ އާޓިފިޝަލް ބީޗުގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.

އެމްޑީޕީގެ އެޑްވައިޒަރު އަދި ކުރީގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވީ، އެމަނިކުފާނުގެ ވެރިކަމުގައިވެސް މިފްކޯ އެސްޓީއޯގެ ދަށުން ވަކިކުރުމަށް، ފިސީބިލިޓީތައް ހެދިކަމަށާއި އެހެން ނަމަވެސް އެގޮތް ރަނގަޅު ނުވި ކަމަށެވެ. އަދި މިއަދު މިފްކޯ އެސްޓީއޯގެ ދަށުގައި އޮތް ނަމަ އެކުންފުންނަށް ލޯނު ލިބޭނެ ގޮތްތައްވެސް ހޯދުނީސް ކަމުގައި އެމަނިކުފާނު ވިދާޅުވިއެވެ.

މީގެ އިތުރުން ރައީސް ޞާލިޙް ވިދާޅުވީ، މަސްވެރިންނަށް ފައިދާ ހުރި ކަމެއްވެސް އަދި މިސަރުކާރަށް ކޮށްދެއްވިފައި ނުވާ ކަމަށެވެ.

މިފްކޯ އެސްޓީއޯގެ ދަށަށް ގެނައީ، 2016 ވަނަ އަހަރު، ރައީސް ޔާމީނުގެ ސަރުކާރުގައެވެ. ރައީސް ޑޮކްޓަރ މުޙައްމަދު މުއިއްޒު ސަރުކާރާއި ހަވާލުވެވަޑައިގެންނެވުމަށްފަހުގައި، ހުސްވި އަހަރުގެ ޑިސެމްބަރު މަހުގެ 20 ވަނަ ދުވަހު ވަނީ އެކުންފުނި އެސްޓީއޯގެ ދަށުން ވަކިކުރައްވައި ވަކިން ހިންގަންފަށާފައެވެ.

އެހެން ނަމަވެސް މިފްކޯގެ ކޭޝް ފްލޯއަށް ދިމާވެފައިވާ ދަތިތަކާއި އެކު އެކުންފުންޏަށް މަސްވެރިން ކިރުވާ މަހަށް ފައިސާ ނުދެވި، ސަރުކާރުން ދަނީ އެކުންފުންޏަށް ފައިސާ ދެމުންނެވެ.

މިފްކޯއަކީ ސަރުކާރުގެ މަސްކުންފުނީގެ ގޮތުގައި 1993 ވަނަ އަހަރު އުފައްދާފައިވާ ކުންފުންޏެކެވެ.