ވިހި ވަނަ ރައްޔިތުންގެ މަޖިލިސް ހޮވުމަށް ބާއްވާ އިންތިހާބު މި އަހަރުގެ ރޯދަމަހާ ދިމާވާތީ، ރޯދަމަހަށްފަހު އިންތިހާބު ބޭއްވުމަށް ރައްޔިތުންގެ މަޖިލީހުގެ އަގުލަބިއްޔަތުން ފާސްކޮށް، ރައީސުލް ޖުމްހޫރިއްޔާ ޑޮކްޓަރ މުޙައްމަދު މުޢިއްޒުއަށް ތަސްދީގުކުރުމަށް ފޮނުވި ބިލް އަނބުރާ މަޖިލީހަށް ފޮނުވާލައިފިއެވެ. މި ބިލް ތަސްދީގު ނުކޮށް އަނބުރާ މަޖިލީހަށް ފޮނުވާލި ސަބަބެއް ކަމުގައި ރައީސް އޮފީހުން ބުނެފައިވަނީ، އިންތިހާބު ފަސްކޮށްފިނަމަ އިންތިހާބުގެ މިންވަންކަމާ އިންސާފުވެރިކަމަށް ހުރަސްއެޅިދާނެތީ ކަމަށެވެ.

ރައްޔިތުންގެ މަޖިލީހުން ފާސްކޮށް، ރައީސުލް ޖުމްހޫރިއްޔާގެ އޮފީހަށް ތަސްދީގު ކުރުމަށް މި ފޮނުވި ބިލުގައި ވާގޮތުން، ރޯދަމަހުގެ ތެރޭގައި އިންތިހާބެއް ބާއްވަން ޖެހޭ ތަރީހެއް އަތުވެއްޖެ ހިންދެއްގައި އިންތިހާބު ބާއްވާނީ ރޯދަމަސް ނިމޭތާ 10 ދުވަސްފަހުންނެވެ. ރައްޔިތުންގެ މަޖިލީހުން ފެބުރުވަރީ 11 ވަނަ ދުވަހު މި ބިލު ފާސްކޮށް، ރައީސުލް ޖުމްހޫރިއްޔާގެ އޮފީހަށް ތަސްދީގު ކުރުމަށް ފޮނުވާފައިވަނީ ފެބުރުވަރީ 12 ވަނަ ދުވަހުއެވެ.

މި ބިލު ތަސްދީގު ނުކޮށް އަނބުރާ މަޖިލީހަށް ފޮނުވާލެއްވިއިރު، މިއީ ރައީސުލް ޖުމްހޫރިއްޔާގެ އޮފީހަށް މި ބިލު ފޮނުވިތާ 14 ވަނަ ދުވަހެވެ. ގާނޫނު އަސާސީގައި ވާގޮތުން، ރައްޔިތުންގެ މަޖިލީހުން ފާސްކޮށްފައި ފޮނުވާ ބިލުތަކަށް 15 ދުވަހުގެ ތެރޭގައި ރައީސުލް ޖުމްހޫރިއްޔާ ގޮތެއް ނިންމަވަން ޖެހިވަޑައިގަންނަވައެވެ.

ރައީސުލް ޖުމްހޫރިއްޔާގެ އޮފީހުން ބިލެއް ފާސްނުކޮށް އަނބުރާ މަޖިލީހަށް ފޮނުވާލާ ހާލަތްތަކުގައި، އަލުން އަނބުރާ އެ ބިލެއް އެއްވެސް ބަދަލެއް ނުގެނަސް ރައްޔިތުންގެ މަޖިލީހުގެ އަގުލަބިއްޔަތުން ފާސްކޮށްފިނަމަ، ރައީސުލް ޖުމްހޫރިއްޔާ އެ ބިލެއް ތަސްދީގު ކުރައްވަން ޖެހިވަޑައިގަންނަވާނެއެވެ. 

އެހެންކަމުން، ރޯދަމަހުގެ ފަހަށް އިންތިހާބު ލަސްވުމަކީ އަދިވެސް އެކަށީގެންވާ ކަމެކެވެ.

ވިހިވަނަ ރައްޔިތުންގެ މަޖިލިސް އިންތިހާބު ބޭއްވުމަށް އިލެކްޝަންސް ކޮމިޝަނުން ނިންމާފައި ވަނީ މާޗު 17، ގައެވެ. އެއީ ރޯދަމަހުގެ ހަތް ވަނަ ދުވަހެވެ. ނަމަވެސް އިންތިހާބުތަކާ ބެހޭ އާންމު ގާނޫނަށް ގެނައި އިސްލާހު ތަސްދީގުކުރި ނަމަ މަޖިލިސް އިންތިހާބު ދެން ބާއްވަން ޖެހޭނީ އޭޕްރިލް 20 ވަނަ ދުވަހުގެ ފަހުންނެވެ.