ރާއްޖޭގައި ޑޮލަރު މާރު ކުރުމަށް ކަނޑައަޅާފައިވާ ރަސްމީ އަަގަށް ބަދަލު ނުގެނެސް ވާން ނެތްކަމުގައި ފިޝަރީޒް މިނިސްޓަރ އަޙްމަދު ޝިޔާމް ވިދާޅުވެއްޖެއެވެ.

މިނިސްޓަރ ޝިޔާމް މިހެން ވިދާޅުވީ، ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު އުތުރުގެ އަތޮޅުތަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން. ހދ ނޮޅިވަރަންފަރު ރައްޔިތުންނާއި އެކު ބޭއްވި ބައްދަލު ކުރެއްވުމުގައެވެ.

މިނިސްޓަރ ޝިޔާމް ވިދާޅުވީ، ކުރީ ސަރުކާރުން ގިނަ އަދަދެއްގެ ފައިސާ ޗާޕްކޮށްފައި ވާތީ، ދިވެހި ރުފިޔާތައް ދުވީ ޑޮލަރު ފަހަތުން ކަމަށާއި ޑޮލަރަށް އޮތް ޑިމާންޑް ބޮޑުވެގެން ގޮސް  18 ރުފިޔާއަށް ވުރެ ކުޑަކޮށް ޑޮލަރު ގަންނަން ލިބިވަޑައިނުގަންނަވާ ކަމަށެވެ. 

ފިޝަރީޒް މިނިސްޓަރ އަޙްމަދު ޝިޔާމް ވިދާޅުވީ، ރައީސް ޑރ. މުޙައްމަދު މުޢިއްޒު ވެރިކަމާއި ހަވާލުވެވަޑައިގެންނެވުމަށްފަހުގައި ފައިސާ ޗާޕް ކުރެއްވުން ހުއްޓަވާލައްވާފައިވާ ކަމަށެވެ. އަދި ފައިސާ ޗާޕްކުރުމަކީ އެކަމުގެ ސަަބަބުން ރައްޔިތުންގެ ދިރިއުޅުމަށް އުނދަގޫ ތަކެއް ކުރިމަތިވާ ކަމެއް ކަމުގައިވެސް ޝިޔާމް ވިދާޅުވިއެވެ.

ރާއްޖޭގައި ރަސްމީ ޑޮލަރު އެކްސްޗޭންޖް ރޭޓަކީ، 15 ރުފިޔާ 42 ލާރިއެވެ. އެހެން ނަމަވެސް، ރާއްޖޭގައި ޑޮލަރަށް އޮތް ޑިމާންޑް ބޮޑުވެ ކަޅުބާޒާރުގައި ޑޮލަރުގެ އެކްސް ޗޭންޖް ރޭޓް ވަނީ 18 ރުފިޔާއަށް މަތިވެފައެވެ.

ރާއްޖޭގެ ޑޮލަރުގެ އެކްސްޗޭންޖް ރޭޓް ބޮޑު ކުރުމަށް ޑޮލަރުން އާމްދަނީ ލިބޭ ބޮޑެތި ވިޔަފާރިވެރިން ދަނީ ސަރުކާރަށް ހުށައަޅައި އެކަމަށް ބާރު އަޅަމުން ކަމުގައި މައުލޫމާތު ލިބިފައިވެ ވެއެވެ.