އިނގިރޭސި ލީގު ކަޕްގެ ފައިނަލް މެޗުގައި އާދީއްތަ ދުވަހުގެ ރޭ ލިވަޕޫލުން ޗެލްސީ ބަލިކޮށް، މުބާރާތް ދިހަވަނަ ފަހަރަށް ކާމިޔާބުކޮށްފިއެވެ. އަނިޔާގެ ސަބަބުން ޓީމުގެ ފުރަތަމަ 11 ގައި ކުޅޭ ގިނަ ކުޅުންތެރިންތަކަކާ ނުލައި ނިކުތް ލިވަޕޫލުން މި މެޗު ކާމިޔާބި ކުރީ 1-0 އިންނެވެ.

އަނިޔާގެ ސަބަބުން މެޗު ނުކުޅެވުނު ލިވަޕޫލުގެ ކުޅުންތެރިންގެ ތެރޭގައި މުޙައްމަދު ސަލާޙް، ޑާވިން ނުނޭޒް، ޑޮމިނިކް ސޮބޮސްލާއި، އެލިސަން، ޓްރެންޓް އެލްކްސެންޑަރ އާނޯލްޑް އަދި ޑިއެގޯ ޖޯޓާ ހިމެނެއެވެ.

މެޗުގެ 90 މިނެޓު ކުޅެވުނުއިރު އެއްވެސް ޓީމަކަށް ގޯލެއް ކާމިޔާބު ކުރެވިފައެއް ނުވެއެވެ. ނަމަވެސް ޗެލްސީގެ ނުރައްކާތެރި ގިނަ ހަމަލާތަކެއް، އެލިސަންގެ ބަދަލުގައި ކުޅެން ނިކުމެ ހުރި ކެލަހާ ވަނީ މަތަކޮށްފައެވެ. މެޗުން މޮޅުވި ގޯލު ލިވަޕޫލަށް ކާމިޔާބުކޮށްދިނީ އިތުރު ވަގުތުގެ ދެވަނަ ހާފުގައި، މެޗު ނިމެން 2 މިނެޓަށްވެފައި ވަނިކޮށް ލިބުނު ކޯނަރަކުންނެވެ. ކޮސްޓާސް ސިމިކާސް ވާތުފައިން ނެގި ކޯނަރު ބޮލުން ޖަހާ ގޯލަށް ފޮނުވާލީ އިސްކޮޅުން ދިގު ޑިފެންޑަރު، އަދި ލިވަޕޫލުގެ ކެޕްޓަން ވާޖިލް ވެން ޑައިކެވެ.

ލީގު ކަޕުގެ ތައްޓާއެކީ، ލިވަޕޫލް އޮތީ މި ސީޒަނުގައި ގިނަ ތަށިތަކެއް ކާމިޔާބުކުރުމުގެ ވަރުގަދަ އަޒުމުގައެވެ. އަދި އެ ޓީމު އަންނަނީ ހުރިހާ ތައްޓަކާއި ވެސް ވަރަށް ކައިރިން ވާދަކުރަމުންނެވެ. މީގެ އިތުރުން މި ސީޒަނަށްފަހު އެ ކްލަބަށް ގިނަ ކާމިޔާބީތަކެއް ހޯދައިދީ، ކުލަބުގެ ފުޓުބޯޅައަށް ބޮޑު އިންގިލާބީ ބަދަލުތަކެއް ގެނަސްދިން ކޯޗު، ޔާގެން ކްލޮޕް އަމިއްލަ ދިރިއުޅުމަށް ވަގުތުދޭން ބޭނުންވާކަމަށް ބުނެ، ޓީމު ދޫކޮށްދާނެކަން ވަނީ އިއުލާންކޮށްފައެވެ.