ޒަމާނުއްސުރެން ކެލާގެ ރައްޔިތުން އެ ރަށު ފަޅު ތެރޭގައި ރިޒޯޓެއް ތަރައްގީ ކުރުމަށް ދެކެމުން އަންނަ ހުވަފެން ރައީސުލް ޖުމްހޫރިއްޔާ ޑޮކްޓަރ މުޙައްމަދު މުއިއްޒުގެ ވެރިކަމުގައި ހަގީގަތަކަށް ހަދައިދޭނެ ކަމުގައި އެ މަނިކުފާނު ވިދާޅުވެއްޖެއެވެ. އެ މަނިކުފާނު މިހެން ވިދާޅުވީ، މިހާރު ރާއްޖޭގެ އުތުރަށް ކުރައްވަމުން ގެންދަވާ ރަސްމީ ދަތުރުފުޅުގައި ކެލާގެ ރައްޔިތުންނާ ބައްދަލު ކުރައްވައި ވާހަކަފުޅު ދައްކަވަމުންނެވެ.

ރައީސް ވިދާޅުވީ، ރިޔާސީ ކެމްޕެއިނުގައި ކެލަޔަށް ވަޑައިގެންނެވުމުން ރައްޔިތުން އެ މަނިކުފާނުގެ އަރިހުން ކޮށްދެން އެދިވަޑައިގެންނެވި ހުރިހާ ކަމެއް ހަނދުމަފުޅު ހުންނެވި ކަމަށާއި، އަދި އެ ދުވަހު ވަޢުދުވެފައިވާ ގޮތަށް އެ ވަޢުދުތައް ފުއްދާނެކަމުގެ ޔަގީންކަން ދެއްވިއެވެ. 

އެގޮތުން އެންމެ އިސްކަމެއް ދޭނީ ޓުއަރިޒަމާއި ގުޅުންހުރި، އެ ރަށު ފަޅުތެރޭގައި ރިޒޯޓު ތަރައްގީ ކުރުމުގެ މަޝްރޫއަށް ކަމުގައި ދެންނެވިއެވެ. އަދި މި ރިޒޯޓު މަޝްރޫއު ވެގެންދާނީ މުޅި އަތޮޅަށް އެ ކަމުގެ ފައިދާ ކުރާނެ މަޝްރޫއެއްކަމަށް އެ މަނިކުފާނު ފާހަގަ ކުރެއްވެވިއެވެ.

މީގެއިތުރުން ރާއްޖޭގައި ބޭނުންކުރާ މިންވަރަށް ކާއެއްޗެހި އުފެއްދުމަކީ އެ މަނިކުފާނުގެ އަމާޒެއް ކަމަށާއި، އެ އަމާޒަށް ވާސިލްވުމަށް، ކެލާ ފަދަ ދަނޑުވެރިކަމަށް ރަގަޅު ރަށްރަށުގެ ދައުރު ބޮޑުވާނެ ކަމުގައި ވިދާޅުވިއެވެ. އެހެންކަމުން، އެ ރަށުގައި ދަނޑުވެރިކަމަށް ހުރި ގޮންޖެހުންތައް ނައްތާލުމުގެ މަސައްކަތްކޮށްދެއްވާނެ ކަމުގެ ޔަގީންކަން ވެސް ރައީސް ދެއްވެވިއެވެ. 

ކެލާގެ އިތުރުން، ރައީސުލް ޖުމްހޫރިއްޔާ ވަނީ ހއ. ދިއްދޫއަށާއި، ހއ. ވަށަފަރަށާއި، ހއ. ފިއްލަދޫއަށާއި، ހއ. ބަރަށަށާއި، ހއ. އުތީމަށާއި އަދި ހއ. މުރައިދޫއަށް މިއަދު ވަޑައިގަންނަވާފައެވެ.