ފީނައިގެން އެންވެރިކަން ކުރާ ކޮންމެ އޮޑިއަކުން މަދުވެގެން އެއް ފަޅުވެރިއަކު ރެސްކިއު ޑައިވަރ ފެންވަރަށް ތަމްރީނު ކުރުމަށް ހިންގާ ޕްރޮގްރާމްގެ ދަށުން މިހާތަނަށް 56 މީހުން ތަމްރީން ކުރެވިފައިވާ ކަމުގައި ފިޝަރީޒް މިނިސްޓަރ އަޙްމަދު ޝިޔާމް މުޙައްމަދު ވިދާޅުވެއްޖެއެވެ.

މިނިސްޓަރ ޝިޔާމް ވިދާޅުވީ، ދެކުނުގެ އަތޮޅުތަކުން 56 ދޯންޏަކުން ކޮންމެ ދޯންޏަކުން އެއް ފަޅުވެރިއަކު، ރެސްކިއު ޑައިވަރ ފެންވަރަށް ތަމްރީނުކޮށްފައިވާ ކަމަށެވެ. މިގޮތުން، އެންމެ ގިނަ ޑައިވަރުން ތަމްރީންކޮށްފައި ވަނީ ގއ. އަތޮޅުންނެވެ. އެއަތޮޅުން އެކަނިވެސް 37 މީހުން ތަމްރީންކޮށްފައިވެއެވެ.

އަދި ސ. މަރަދޫއިން 11 މީހުންނާއި، ގދ މަޑަވެލިން 08 މީހުން މި ޕްރޮގްރާމްގެ ދަށުން ވަނީ ތަމްރީންކޮށްފައެވެ.

މަސްވެރިކަން ކުރާ އޮޑިދޯނިިފަހަރުގެ ތެރެއިން، ފީނައިގެން އެންވެރިކަން ކުރާ ކޮންމެ އޮޑިއަކުން މަދުވެގެން އެއް ފަޅުވެރިއަކު ރެސްކިއު ޑައިވަރ ފެންވަރަށް ތަމްރީނުކުރުމަކީ، ފީނުމުގެ ތެރޭގައި ހިނގާ ހާދިސާތައް މަދުކުރުމުގެ ގޮތުން ކުރިޔަށް ގެންދާ ޕްރޮގްރާމެކެވެ. ރާއްޖޭގައި އެންމެ ގިނައި ފީނައިގެން އެންހިފަނީ ހުވަދު އަތޮޅުގައި ކަމަށް ވާއިރު، ފީނުމުގެ ތެރޭގައި ހިނގާ ހާދިސާތަކުގައި މީހުން، ޑީކޯ ވުމާއި މަރުވުމުގެ ހާދިސާތައް އެއަތޮޅުގައި އިތުރުވެފައިވެއެވެ.