އިންގްލިޝް ޕްރިމިއަ ލީގުގައި ހޮނިހިރު ދުވަހުގެ ރޭ މެންޗެސްޓަރ ސިޓީ އާއި އާސެނަލް ވެސް އެ ދެ ޓީމުން ކުޅުނު މެޗުތައް ކާމިޔާބުކޮށް 3 ޕޮއިންޓު ކަށަވަރުކޮށްފިއެވެ. ދެ ޓީމުން ވެސް އޮތީ ލީގު ރޭހުގައި ދުލެއް ނުދީ ކުރިޔަށް ދިއުމުގެ ވަރުގަދަ އަޒުމުގައެވެ.

ހޮނިހިރު ދުވަހުގެރޭ މެންޗެސްޓަރ ސިޓީއިން 1-0 އިން ބޯންމައުތު ބަލިކުރިފަހުން، އެ ރޭ ދަންވަރު އާސެނަލް ވަނީ 4-1 އިން ނިއުކާސްލް ޔުނައިޓެޑް ބަލިކޮށްފައެވެ. މި މޮޅާއެކު ލިބުނު 3 ޕޮއިންޓުން މެންޗެސްޓާ ސިޓީ ވަނީ ލީގުގެ އެއްވަނައިގައި އޮތް ލިވަޕޫލާ 1 ޕޮއިންޓު ކައިރިޔަށް ޖެހިލާފައެވެ. އަދި އާސެނަލް އޮތީ ލިވަޕޫލަށް ވުރެން 2 ޕޮއިންޓު މަދުން ލީގުގެ ތިންވަނައިގައެވެ. 

މެންޗެސްޓަރ ސިޓީއިން ބޯންމައުތު ކޮޅަށް ޖެހި ހަމައެކަނި ގޯލު ކާމިޔާބުކޮށްދީފައިވަނީ މިހާރު ރަގަޅު ފޯމެއްގައި ކުޅެމުން އަންނަ ފިލް ފޯޑެންއެވެ. މިއީ މި އަހަރު ފެށުނުފަހުން ގޯލާއި ބީރަށްޓެހި އާލިން ހާލަންޑު ޖެހި ބާރު ޝޮޓެއް، ބޯންމައުތު ކީޕަރު މަތަކުރަން އުޅުމުގެ ތެރޭގައި ފޯޑަން ކާމިޔާބު ކުރި ގޯލެކެވެ. މުޅި މެޗުގައި ވެސް ފޯޑަން ވަނީ މޮޅު ކުޅުމެއް ދައްކާފައެވެ. މެޗަށްފަހު ގާޑިއޯލާ ވަނީ އޭނާގެ ކުރިއެރުމާއި މޮޅު ހުނަރު ފާހަގަކޮށް، އެކަމަށް ތައުރީފު ވެސް ކޮށްފައެވެ.

ނިއުކާސްލްއާ ދެކޮޅަށް ކުޅުނު މެޗުގައި އާސެނަލް ފެނުނީ ނުހިފެހެއްޓޭވަރުގެ ޓީމެއްހާ ވަރުގަދަކޮށެވެ. އެއީ މި މެޗުގައި ނޫނަސް، މި އަހަރު ފެށުނު ފަހުން އެ ޓީމުން ދައްކަމުން އަންނަ ތަފާތު މޮޅު ކުޅުމެކެވެ. 

ނިއުކާސްލްގެ ކުޅުންތެރިއެއްގެ އަތުން ބައިކޮޅަށް ވަތް ގޯލަކާއެކު އާސެނަލްއަށް ލީޑު ލިބިފައިވަނިކޮށް، ކައި ހަވަޓްސް އެޓީމަށް ލީޑު ފުޅާކޮށްދިނީ މެޗުގެ 24 ވަނަ މިނެޓުގައެވެ. އާސެނަލްގެ ތިން ވަނަ ގޯލާއި ހަތަރު ވަނަ ގޯލު ކާމިޔާބުކުރީ ދެވަނަ ހާފުގައި ބުކަޔޯ ސަކާއާއި ޖަކުބް ކިވިއޯއެވެ. 

މި ނަތީޖާއާއެކު އާސެނަލް މިވަނީ ޕްރިމިއަ ލީގުގެ ރެކޯޑެއް ވެސް މުގުރާލާފައެވެ. އެއީ ޖެހިޖެހިގެން 7 ހާފުގައި 2 ގޯލު ނުވަތަ އެއަށްވުރެން ގިނަ ގޯލު ކާމިޔާބުކޮށްގެން ހަދާފައިވާ ރެކޯޑެކެވެ.