ދުޅަހެޔޮ ހަށިހެޔޮ މުޖުތަމައަކަށް ބާރުއެޅުމަށް އެހީވުމަށް ފަރުމާކުރަމުންދާ 'ފިޓް މޯލްޑިވްސް' އެޕްލިކޭޝަން މިއަދު ރަސްމީކޮށް އިފްތިތާހުކޮށްފިއެވެ. 

މި އެޕްލިކޭޝަން އިފްތިތާޙުކޮށްދެއްވީ މިކަމަށްޓަކައި ބޭއްވި ހާއްސަ ރަސްމިއްޔާތެއްގައި ދިވެހި ދައުލަތަށް ގިނަ ދުވަހު ޚިދުމަތްކުރެއްވި މަރިޔަމް ވަހީދާއެވެ. މި ރަސްމިއްޔާތުގައި ކުޅިވަރު އެސޯސިއޭޝަންތަކާއި، ކުޅިވަރުގެ އެކި ދާއިރާގެ ހިދުމަތްތެރިންގެ އިތުރުން، ފިޓްނަސް ސެންޓަރުތައް ހިންގާ ފަރާތްތަކުންވެސް ބައިވެރިވިއެވެ.

'ފިޓް މޯލްޑިވްސް' އެޕްލިކޭޝަނަކީ ކުޅިވަރާއި ކަސްރަތުގެ ދާއިރާގައި ހަރަކާތްތެރިވާ އެންމެހާ ފަރާތްތަކާއި ކުލަބު ޖަމުޢިއްޔާތަކާއި ޤައުމީ ކުޅިވަރު އެސޯޝިއޭޝަންތަކަށް ޚާއްޞަ އެޕްލިކޭޝަނެކެވެ. މި އެޕްލިކޭޝަންގައި ކެއުމުގެ ޕްލޭންތަކާއި، ކަސްރަތުގެ ތަފްސީލްތަކާއި، ފިޓްނަސް ސެންޓަރުތަކާއި، ޓްރެއިނަރުންގެ ތަފްސީލްތައް ވެސް ހުންނާނެކަމަށް މިނިސްޓްރީ އޮފް ސްޕޯޓްސް، ފިޓްނަސް އެންޑް ރެކްރިއޭޝަނުން މައުލޫމާތު ދެއެވެ. މިގޮތުން ކުޅިވަރާއި ކަސްރަތުގެ ރަނގަޅު އާދަތާކާއި، ރަނގަޅު ގޮތްތަކާއި، ކަސްރަތު ތާވަލާއި، އެހެނިހެން އިލްމީ މައުލޫމާތުވެސް ހިމެނިފައިވާނެކަމަށް ވެސް އެ މިނިސްޓްރީ އިން ހާމަކޮށްފައިވެއެވެ.

މި އެޕްލިކޭޝަން އަދި އެޕަލް ސްޓޯރުން ފެންނާކަށް ނެތެވެ. ނަމަވެސް ވެބް ބްރައުޒާއިން http://fitmaldives.sports.gov.mv/ ޖެހުމުން ފިޓް މޯލްޑިވްސްގެ ވެބްސައިޓަށް ޒިޔާރަތް ކުރެވެއެވެ. މި ވެބްސައިޓުގައިވާގޮތުން، ފިޓް މޯލްޑިވްސް އެޕްލިކޭޝަން ލޯންޗުކުރާނީ މާޗު 8 ވަނަ ދުވަހުއެވެ.