މިއަހަރުގެ މާރިޗު މަހުން ފެށިގެން ފުލުހުންނާއި ސިފައިންގެ މުސާރަތައް ބޮޑު ކުރައްވާނެ ކަމުގައި ރައީސުލްޖުމްހޫރިއްޔާ، ޑރ މުހައްމަދު މުޢިއްޒު ވިދާޅުވި ވިދާޅުވުން ރޭ ތަކުރާރުކުރައްވައިފިއެވެ.

ރައީސުލްޖުމްހޫރިއްޔާގެ އޮފީހާއި ޕީއެސްއެމް ގުޅިގެން ބާއްވަމުން އަންނަ ސިލް ސިލާ ފޯރަމް "އަހާ"ގެ ދެވަނަ ފޯރަމް ރޭ ސަލްޓަންޕާކުގެ ސްޓޭޖުގައި ބާއްވާފައި ވާއިރު، އެފޯރަމްގައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ވަނީ، ފުލުހުންނާއި ސިފައިންގެ މުސާރަތައް ބޮޑުކޮށްދެއްވާނެ ކަމުގައި ވިދާޅުވާ ވިދާޅުވުން ތަކުރާރު ކުރައްވާފައެވެ.

ރައީސުލްޖުމްހޫރިއްޔާ ވިދާޅުވީ، މިފެށޭ މާރިޗުމަހުން ފެށިގެން ފުލުހުންނާއި ސިފައިންގެ މުސާރަތައް ބޮޑު ކުރައްވާނެ ކަމަށެވެ.

އެންމެ ފުރަތަމަ ފުލުހުންނާއި ސިފައިންގެ މުސާރަތައް ބޮޑުކުރެއްވުމަށް ސަރުކާރުން ހަމަޖައްސަވާފައި ވަނީ، މިއަހަރުގެ ޖެނުއަރީ މަހުގެ 1 ވަނަ ދުވަހުން ފެށިގެންނެވެ. އެހެން ނަމަވެސް އެނިންމުން ތަންފީޒް ކުރުން ލަސްކުރީ ދައުލަތުގެ މާލީ ހާލަތު ގޯސްވެގެންނެވެ. 

ދައުލަތުގެ މާލީ ހާަލަތު ގޯސްވެގެން، ފުލުހުންނާއި ސިފައިންގެ މުސާރަތައް ބޮޑުކުރުން، މާރިޗު މަހުގެ 1 ވަނަ ދުވަހަށް ފަސްކުރެއްވިކަން ފުލުހުންނާއި ސިފައިން ހާމަކުރެއްވީ، ޖެނުއަރީ 3 ވަނަ ދުވަހުގައެވެ. ފުލުހުންނާއި ސިފައިންގެ މުސާރަތައް ބޮޑުކުރުން ފަސްކުރި އިރަށް ވުރެ މިހާރު ދައުލަތުގެ މާލީ ހާލަތު އިތުރަށް ގޯސްވެފައި ވާއިރު، އަންނަ މަހުގެ 1 ވަނަ ދުވަހު މުސާރަތައް ބޮޑުކޮށްދެއްވާނެކަން ޢިއުލާނު ކުރެއްވުން ފިޔަވައި އިތުރު ތަފްސީލެއް ރައީސް ނުދެއްވައެވެ.

ދައުލަތުގެ މާލީ ހާލަތު އިތުރަށް ގޯސްވެފައި ވާތީ، ޚަރަދުތައް ކުޑަކުރެއްވުމަށާއި، ރާއްޖެއިން ބޭރަށް ކުރާ ދަތުރުތައް މަދު ކުރެއްވުމަށް ރައީސުލްޖުމްހޫރިއްޔާ ވަނީ ދައުލަތުގެ އިދާރާތަކަށް އަންގަވާފައެވެ. މީގެ އިތުރުން ދައުލަތުގެ ބަޖެޓުން ޚަރަދު ކުރަންޖެހޭ މަޝްރޫޢުތަކުގެ ތެރެއިން ބޮޑެތި ޚަރަދުތައް ހިނގާ ކަންކަން، ފިނޭންސް މިނިސްޓްރީގެ ހުއްދަ ނެތި ނުފެށުމަށްވެސް ވަނީ އަންގާފައެވެ. 

ކުރިޔަށް އޮތް ދެތިން މަހަކީ، ރާއްޖެއަށް އިޤުތިޞާދީ ގޮތުން ވަރަށް ބޮޑަށް ދަތިވެގެންދާނެ ދެ މަސްދުވަސް ކަމުގައި ރައީސުލްޖުމްހޫރިއްޔާ ވަނީ މީގެ ކުރިން ވިދާޅުވެފައެވެ.