ފުޓުބޯޅަ އެސޯސިއޭޝަން އޮފް ދަ މޯލްޑިވްސް (އެފްއޭއެމް)ގެ އެގްޒެކެޓިވް ކޮމެޓީ (އެކްސްކޯ)ގެ މެމްބަރެއްގެ ގޮތުގައި މަސައްކަތްކުރި މުފާވިޒު ހާޝިމް (މުފާ) އެ މަގާމުން އިސްތިއުފާ ދީފިއެވެ. މުފާއަކީ އެފްއޭއެމްގެ މިހާރުގެ ރައީސް، ބައްސާމް އަދީލް ޖަލީލުގެ ފުރަތަމަ ދައުރުގައި ވެސް އެކްސްކޯ މެމްބަރެއްގެ ގޮތުގައި މަސައްކަތްކުރި ފަރާތެކެވެ.

މުފާއަކީ މިދިޔަ ޖެނުއަރީ މަހުގެ 31 ވަނަ ދުވަހު ބޭއްވުމަށް މަސައްކަތްކުރި އެފްއޭއެމްގެ އިންތިހާބުގައި ވެސް ވާދަކުރުމަށް ކުރިމަތިލި ފަރާތެކެވެ. ނަމަވެސް އިންތިހާބުގެ ކަންތައްތައް ކުރިޔަށް ދިޔަ ގޮތާ ގުޅިގެން ބޮޑެތި މައްސަލަތަކެއް ކުރިމަތިވެ، އެ އިންތިހާބު ކުރިޔަށް ނުގެންގޮސް ހުއްޓާލުމަށް އޭއެފްސީ އާއި ފީފާއިން ވެސް ވަނީ އަންގާފައެވެ. އަދި އިންތިހާބު އިތުރަށް ކުރިޔަށް ގެންދެވޭނީ، އެފްއޭއެމް ހިންގުމުގައި ހުރި އިދާރީ ބައެއްކަންކަން ރަގަޅު ކުރުމަށްފަހުގައިކަމަށް އެ އިދާރާތަކުން ވަނީ އަންގާފައެވެ. 

އެފްއޭއެމްގެ އިދާރީ މައްސަލަތައް ހައްލު ކުރުމަށް މި މަހު ވަނީ އެ އެސޯސިއޭޝަންގެ ކޮމެޓީތައް އެކުލަވާލުމުގެ އިންތިހާބު ބާއްވާފައެވެ. ދެން އޮތީ އިންތިހާބު އަލުން ބޭއްވުމަށް އިއުލާންކުރުމެވެ. އެ އިންތިހާބުގައި ވާދަކުރައްވާނެތޯ ނުވަތަ ނޫންތޯ ނޫސްވެރިއަކު ކުރި ސުވާލުގައި މުފާ ބުނެފައިވަނީ އެކަން އެނގޭނީ އިންތިހާބު އިއުލާންކުރުމުން ކަމަށެވެ.