ޔޫރޮޕާ ލީގުގެ ޕްލޭއޮފްގެ ދެވަނަ ލެގުގައި ބުރާސްފަތި ދުވަހުގެރޭ ފްރާންސްގެ މާސޭ އާއި ޔޫކުރެއިންގެ ޝަކްތަރު ޑޮނެޓްސްކް ބައްދަލުކުރި މެޗުގައި ކާމިޔާބުކުރި ގޯލާއެކު، ފްރާންސަށް ނިސްބަތްވާ ޕިއެރޭ-އެމެރިކް އައުބަމަޔަންގް މިހާތަނަށް ޔޫރޮޕާ ލީގުގައި އެންމެ ގިނަ ގޯލު ކާމިޔާބުކުރި ކުޅުންތެރިޔާގެ ޝަރަފު ހޯދައިފިއެވެ. މި މެޗާއި ހަމައަށް އައިއިރު، ޔޫރޮޕާ ލީގުގައި އެންމެ ގިނަ ގޯލު ޖަހާފައިވާ ކުޅުންތެރިންގެ ގޮތުގައި ތިބީ ރަޑަމެލް ފަލްކާއޯ އާއި އައުބަމަޔަންގްއާ ދެ ކުޅުންތެރިންނެވެ. އެއީ 30 ގޯލާއެކުއެވެ. ނަމަވެސް މާސޭއަށް ކުޅެމުން އަންނަ އައުބަމަޔަންގުގެ އިތުރު ގޯލަކާއެކު، މިހާރު މި ޝަރަފު އޮތީ 31 ގޯލާއެކު ހަމައެކަނި އޭނާގެ އަތުގައެވެ.

ޔޫރޮޕާ ލީގަކީ ޔޫއެފާ ކަޕް ރޭބްރޭންޑުކޮށް، 2009 ގައި ކުޅެން ފެށުނު މުބާރާތެކެވެ. އެގޮތުން ޔޫއެފާ ކަޕުގެ ގޯލު ރެކޯޑާ އެކީ ބެލިނަމަވެސް، އައުބަމަޔަންގު އުޅެނީ ކުރީގައެވެ. ދެ މުބާރާތް އެއްކޮށް ބަލާނަމަ، 31 ގޯލާއެކީ އައުބަމަޔަންގްއަށް މި ހަމަކުރެވުނީ ސްވިޑުން ކުރީގެ މަޝްހޫރު ފޯވާޑު، ހެންރިކް ލާސަންއާއެވެ. އޭނާ ވަނީ ޔޫއެފާ ކަޕްގައި 31 ގޯލު ކާމިޔާބުކޮށްފައެވެ.

އައުބަމަޔަންގު ވަނީ ގިނަ ކްލަބުތަކަކާއެކު ޔޫރޮޕާ ލީގުގެ މެޗުތައް ކުޅެފައެވެ. އެގޮތުން އާސެނަލް ކުޅުންތެރިއެއްގެ ގޮތުގައި އޭނާ 14 ގޯލު ކާމިޔާބުކޮށްފައިވާއިރު، ބޮރޫޝިއާ ޑޯޓުމަންޑާއެކު އޭނާ ވަނީ 8 ގޯލު ކާމިޔާބުކޮށްފައެވެ. އަދި ބާސެލޯނާއަށް 2 ގޯލު ކާމިޔާބުކޮށްދިންއިރު މިހާރު މާސޭގެ ކުޅުންތެރިއެއްގެ ގޮތުގައި މިވަނީ 7 ގޯލު ކާމިޔާބުކޮށްފައެވެ.