މަސްވެރިންނަށް ސަރުކާރުން ދޭންޖެހި ނުދެވި އޮތް ފައިސާގެ ތެރެއިން، ހޯމަ ދުވަހުގެ ނިޔަލަށް ސަތޭކަ މިލިޔަން ރުފިޔާ ދޫކުރެވޭނެ ކަމުގައި ސަރުކާރުން ބުނެފިއެވެ.

މިނިސްޓްރީ އޮފް ފިޝަރީޒް އެންޑް އޮޝަން ރިސޯސަސް އިން ނެރުނު ނޫސް ބަޔާނެއްގައި ބުނީ، ބުދަ ދުވަހުގެ ރެއާއި ހަަމައަށް މަސްވެރިންނަށް، 70 މިލިއަން ރުފިޔާ ޖަމާކޮށްދީފައިވާ ކަމަށާއި، މިފެބުރުއަރީ މަހުގެ 26 ވާ ހޯމަދުވަހުގެ ކުރިން އިތުރު 30 މިލިޔަން ރުފިޔާ އާއެކު ޖުމުލަ 100 މިލިޔަން ރުފިޔާ މިހަފްތާގެ ތެރޭގައި މަސްވެރިންނަށް ޖަމާކޮށްދޭނެ ކަމަށެވެ.

މީގެ އިތުރުން އެމިނިސްޓްރީން ބުނެފައި ވަނީ، ކޫއްޑޫގައި މަސްވެރިން ކުރަމުންދިޔަ މުޒާހަރާތައް ހުއްޓާލުމާއި ގުޅިގެން، ކޫއްޑޫގެ އޮޕަރޭޝަންސްތައް އާއްމު ހާލަތުގައި މިހާރު ކުރިޔަށް ގެންދަން ފަށާފައިވާ ކަމަށެވެ.

އަދި މިފަދަ ދަނޑިވަޅުތަކުގައި،  މަސްވެރިކަމާއި ގުޅުން ހުރި ހަރަކާތްތައް ހިންގާ ފެސިލިޓީތައް ހުއްޓިފައި އޮންނަ އޮތުމާއި ގުޅިގެން އެކަމުގެ ސަބަބުން މަސްވެރިންނަށާއި، މަސްވެރި އާއިލާތަކަށާއި، އަދި ކުންފުނިތަކަށް ބޮޑެތި ގެއްލުންތައްވަމުންދާ ކަމީ، ސަރުކާރާއި އެމިނިސްޓްރީން ކަންބޮޑުވާ ކަމެއް ކަމަށާއި، އެފަދަ ކަންކަން ތަކުރާރުވިޔަ ނުދިނުމަށް، އެންމެ އެކުގައި މަސައްކަތް ކުރުމުގެ މުހިއްމުކަން ފާހަގަކުރާ ކަމަށެވެ.

މަސްވެރިންނަށް ސަރުކާރަށް ނުދެވި ހުރި ފައިސާގެ އަދަދު 310 މިލިއަނަށް އަރާކަމުގައި ހޯމަދުވަހު ފިޝަރީޒް މިނިސްޓަރ ވިދާޅުވިއެވެ.