ރާއްޖޭގެ ރަށްރަށުގެ ސިއްޙީ ޚިދުމަތްދޭ ތަންތަނުގެ ތެރެއިން ލެބޯޓްރީއެއް ޤާއިމްކޮށް ޚިދުމަތް ލިބެމުން ނުދާ، 76 ރަށެއްގައި ލެބޯޓްރީ ޚިދުމަތް ފެށުމުގެ މަޝްރޫޢެއް މިއަދު އިފްތިތާޙްކޮށްފިއެވެ.

ދަރުމަވަންތަ ހޮސްޕިޓަލުގެ އުޑުވިލާ މާލަމުގައި ކުރިއަށްދިޔަ ރަސްމިއްޔާތުގައި މިމަޝްރޫޢު އިފްތިތާހްކޮށްދެއްވީ، ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފެވެ.

މިމަޝްރޫޢުގެ ދަށުން، ފުރަތަމަ ހަތަރު ރަށެއްގައި މިއަދު ވަނީ ލެބޯޓްރީ ޚިދުމަތް ފަށާފައެވެ. އަދި މިއަހަރުގެ މެއި މަހުގެ ނިޔަލަށް އިތުރު 72 ރަށުގައި ލެބޯޓްރީގެ ޚިދުމަށް ސިއްޙީ ޚިދުމަތްދޭ ތަންތަނުގައި ޤާއިމްކޮށް ޚިދުމަތްދޭން ފަށާނެ ކަމުގައިވެސް ރައީސުލްޖުމްހޫރިއްޔާގެ ނައިބު މިރަސްމިއްޔާތުގައި ދެއްކެވި ވާހަކަފުުޅުގައި ވިދާޅުވިއެވެ.

ރައީސުލްޖުމްހޫރިއްޔާގެ ނައިބު ދެއްކެވި ވާހަކަފުޅުގައި، އާންމު ޞިއްޙީ ޚިދުމަތްތައް ދިވެހިރާއްޖޭގެ އެކި ކަންކޮޅުތަކުގައި ދިރިއުޅޭ ރައްޔިތުންނަށް މިހާރަށްވުރެ ރަނގަޅު ފެންވަރެއްގައި ފޯރުކޮށްދިނުމަކީ މި ސަރުކާރުން ވަރަށް ބޮޑު އަހުމިއްޔަތުކަމެއް ދެއްވައިގެން ކުރަމުން އަންނަ މަސައްކަތެއްކަން ފާހަގަ ކުރެއްވިއެވެ. އެގޮތުން ދިވެހިރާއްޖޭގައި މީހުން އާބާދުވެފައިވާ ކޮންމެ ރަށެއްގައި، ޞިއްޙީ ފަރުވާއަށް ބޭނުންވާ ލެބޯޓްރީގެ ޚިދުމަތް ފުޅާކުރުމުގެ މަޝްރޫޢެއްގެ ތާވަލު އެކުލަވާލައި ތަންފީޒުކުރަން ފެށުމަކީ، ރައީސުލްޖުމްހޫރިއްޔާގެ ހަފުތާ 14 އެޖެންޑާގައި ހިމެނޭ މުހިންމު ވަޢުދެއްކަމުގައިވެސް އެމަނިކުފާނު ވިދާޅުވިއެވެ.

ލެބޯޓްރީގެ ޚިދުމަތް ޤާއިމްކުރުމަށް މިއަދު ފެށި މަޝްރޫޢުގައި ހިމެނިފައިވާ 76 ރަށުގައި މިހާތަނަށް ދެމުން އައީ މޮބައިލް ލެބޯޓްރީގެ ޚިދުމަތްތަކެެވެ.