މާލެ އާއި ހުޅުމާލޭގެ މަގުތައް މައްޗަށް ދޫކޮށްލާފައި ހުރި ބައު އުޅަނދުތައް ނައްތާލުމަށް، ފެށި ޕްރޮގްރާމްގެ ތެރެއިން މިހާތަނަށް ހަތަރުފުރޮޅުލީ 56 އުޅަނދެއް ނައްތާލާފައިވާ ކަމުގައި މިނިސްޓްރީ އޮފް ޓްރާންސްޕޯޓް އެންޑް ސިވިލްއޭވިއޭޝަނުން ބުނެފިއެވެ.

އެމިނިސްޓްރީން ބުނީ މިފެބުރިއަރީ މަހުގެ 17 ވަނަ ދުވަހު،  ފުލުހުންގެ ޚިދުމަތް، މާލޭ ސިޓީކައުންސިލް، ހައުސިންގ ޑިވެލޮޕްމަންޓް ކޯޕަރޭޝަން، ވޭސްޓް މެނޭޖްމަންޓް ކޯޕަރޭޝަންއާއި ގުޅިގެން ފެށި ޕްރިގްރާމްގެ ދަށުން މަގުތަކުން ގިނަ އަދަދެއްގެ އުޅަނދު ނަގައި ނައްތާލެވިފައިވާ ކަމަށެވެ.

މިކަމަކީ، މާލެސަރަހައްދުގައި ދިމާވެފައިވާ އެއްގަމު އުޅަނދު ތޮއްޖެހުމުގެ މައްސަލަތަކަށް ހައްލުހޯދުމަށްޓަކައި ފަށާފައިވާ މަސައްކަތެއް ކަމުގައިވެސް ޓްރާންސްޕޯޓް މިނިސްޓްރީން ވަނީ ވިދާޅުވެފައެވެ. މިގޮތުން، ޤަވާއިދާ ހިލާފަށް ބޭނުންނުކޮށް މާލެއާއި ހުޅުމާލޭގެ މަގުތަކުގައި ބަހައްޓާފައިވާ އުޅަނދުތައް ހަމަޖެހިފައިވާ އުސޫލުގެ ތެރެއިން މަގުމަތިންނަގާ ނައްތާލާނެކަން އެމިނިސްޓްރީ އާއްމުކޮށް އަންގައި އިއުލާނުކުރީ ފެބުރުއަރީ މަހުގެ 17 ވަނަ ދުވަހުގައެވެ.

މާލެ އާއި ހުޅުމާލޭގެ މަގުތައް މަތީގަޔާއި ހުސްބިންތަކުގައި އަދި މާލޭ އިންޑަސްޓްރިއަލް ވިލެޖުގައި ބައު އުޅަނދު ފަހަރާއި ޤަވާއިދާ ޚިލާފަށް ބޭނުންކުރާ ގިނަ އަދަދެއްގެ އުޅަނދުފަހަރު ޕާކުކޮށްފައި އޮތުމުގެ ސަބަބުން އެކުގެ ދަތިކަން އާއްމު ފަރާތްތަކަށްވެސް އަންނަނީ ފޯރަމުންނެވެ.