އިންޑިއާއިން ފިޔާ އެކްސްޕޯޓް ކުރަން ނިންމި ގައުމުތަކުގެ ލިސްޓުގައި ދިވެހިރާއްޖެ ނުހިމެނޭ ކަމަށް އެ ގައުމުގެ ނޫސްތަކުން ރިޕޯޓުކޮށްފައިވީ ނަމަވެސް އިންޑިއާއިން ފިޔާ ލިބުމުގައި އެއްވެސް ދަތިކަމެއް ނެތް ކަމުގައި އެކުންފުނިން ބުނެފިއެވެ.

އެސްޓީއޯއިން ބުނީ ކުރިއެކޭވެސް އެއްފަދައިން އެސްޓީއޯއިން އާއްމުކޮށް ފިޔާ ވިއްކަމުންދާނެ ކަމަށާއި، ފިޔާ ސަޕްލައިކުރުމުގެ އެއްވެސް ދަތިކަމެއް ނެތްކަމަށެވެ. އަދި ފާއިތުވި ދެމަހުގެ މާކެޓް ޓްރެންޑަށް ބަލާކަމުގައިވާނަމަ ރާއްޖޭގެ މާކެޓްގައި ފިޔާގެ އަގު އަންނަނީ ދަށްވަމުން ކަމުގައިވެސް އެސްޓީއޯއިން ވަނީ ބުނެފައެވެ. ކުރިއަށްއޮތް ރަމަޟާންމަހު އަސާސީ ކާބޯތަކެތި ލިބުމުގައި ދަތިކަމެއް ކުރިމަތިވިޔަ ނުދިނުމަށް އެސްޓީއޯއިން ވަނީ ފުރިހަމައަށް ތައްޔާރުވެފައި ކަމުގައިވެސް އެކުންފުނިން ވަނީ ބުނެފައެވެ.

ކޮންމެ އަހަރެއްގެވެސް ރޯދަމަހު، ފިޔާ، އަލުވި އަދި ބިހުގެ އަގުތައް އުފުލިގެންދާތީ އެކަން ކޮންޓްރޯލް ކުރުމަށް އެސްޓީއޯއިން ޚާއްޞަ ފިޔަވަޅުތަކެއް އަޅައެވެ. މިއަހަރުގެ ރަމަޟާން މަސް ފެށޭނީ އަންނަ މާރިޗު މަހުގެ 11 ވަނަ ދުވަހުގައެވެ.