އއ. ތޮއްޑޫގައި ގޭންގަކުން ރަޝިއާގެ ދެފަތުރުވެރިއަކަށް ހަމަލާދީ އެކަކު ޒަޚަމްކޮށްލާފައިވާކަމަށް ފަތުރަނީ ދޮގުވާކަހަކައެއް ކަމުގައި އެރަށުގައި ގެސްޓް ހައުސް ހިންގާ ފަރާތްތަކުން ބުނެފިއެވެ.

ސޯޝަލް މީޑިއާގެ ބައެއް އެކައުންޓްތަކުގައި، ތޮއްޑޫގައި ދެ ފަތުރުވެރިއަކަށް ގޭންގަކުން ހަމަލާދީފައިވާ ކަމަށް ބުނެ ވާހަކަތައް ފަތުރަމުން ދިޔަ ނަމަވެސް، ތޮއްޑޫގައި އެފަދަ ކަމެއް ހިނގާފައިވާ ކަމުގެ އެއްވެސް މައުލޫމާތެއް ނެތްކަމުގައި އެފަރާތްތަކުން ބުނެފައިވެއެވެ.

ފުލުހުންގެ އިދާރާއިން ވިދާޅުވީ، ތޮއްޑޫގެ ގެސްޓް ހައުސެއްގައި މަސައްކަތްކުރާ މުވައްޒަފެއްގެ ގައިގައި މީހަކު ޖަހައި މާރާމާރީ ހިންގި މައްސަލައެއް ފުލުހުންނަށް އިއްޔެ ހުށައެޅިފައިވާ ކަމަށެވެ. އެމައްސަލަ ފުލުހުންނަށް ރިޕޯޓްކޮށްފައި ވަނީ އިއްޔެ ހަވީރު، 18:30ގައި ކަމުގައިވެސް ފުލުހުންގެ އިދާރާއިން ވަނީ ވިދާޅުވެފައެވެ. އަދި އެމާރާމާރީގައި އަނިޔާވެފައި ވަނީ 42 އަހަރުގެ ރަޝިޔާ އަންހެނަކަށް ކަމަށާއި، ތޮއްޑޫ ހެލްތު ސެންޓަރުގައި އޭނާއަށް ފަރުވާ ދިނުމަށްފަހު ދޫކޮށްލާފައިވާ ކަމުަގައިވެސް ފުލުހުންގެ އިދާރާއިން ވަނީ ވިދާޅުވެފައެވެ.

ފުލުހުންގެ އިދާރާއިން ވިދާޅުވީ، އެމާރާމާރީގެ މައްސަލަ ތަޙްޤީޤުކުރަމުންދާ ކަމަށާއި މިހާތަނަށް އެމައްސަލައިގައި މީހަކު ހައްޔަރުކޮށްފައި ނުވާކަމަށެވެ.