އިލެކްޝަންސް ކޮމިޝަނުގެ ނައިބު ރައީސް އިސްމާއީލް ހަބީބުގެ މެމްބަރުކަމުގެ ދައުރު ނިމޭތީ ހުސްވާ މަގާމަށް އައްޔަނު ކުރަން އެ ކޮމިޝަނުގެ ސެކްރެޓަރީ ޖެނެރަލް ހަސަން ޒަކަރިއްޔާގެ ނަން ރައީސް ޑރ. މުހައްމަދު މުއިއްޒު ރައްޔިތުންގެ މަޖިލީހަށް ހުށަހަޅުއްވައިފިއެވެ.

ރައީސް ޑރ. މުހައްމަދު މުއިއްޒު މަޖިލީހަށް މިއަދު ފޮނުއްވި ސިޓީފުޅެއްގައި ވިދާޅުވީ ހަބީބްގެ މެންބަރު ކަމުގެ ދައުރު އަންނަ މަހު 13 އަށް ހަމަވާތީ އެ މަގާމަށް ކުރިމަތިލުމަށް އާންމުކޮށް އިއުލާން ކުރުމަށް ފަހު އިޖާބަ ދެއްވި ބޭފުޅުންގެ ނަންތައް ފޮނުވާފައިވާ ކަމަށެވެ.

އޭގެ ތެރެއިން ރައީސް ހުށަހަޅުއްވާފައިވާ ނަމަކީ 2021 ވަނަ އަހަރުން ފެށިގެން އީސީގެ އެސްޖީގެ މަގާމް އަދާ ކުރަމުން އަންނަ ޒަކަރިއްޔާއެވެ.

ރިޔާސަތުން ވަނީ އެ މައްސަލަ ދިރާސާ ކުރުމަށް މިނިވަން މުއައްސަސާތަކާ ބެހޭ ކޮމިޓީ އަށް ފޮނުވައިފައެވެ. އީސީގެ މެންބަރު ކަމުގެ ދައުރަކީ ފަސް އަހަރެވެ.

އީސީގެ ނައިބު ރައީސްގެ މަޤާމުގައި މިހާރު ހުންނެވި އިސްމާއިލް ހަބީބް މިހާރު އަދާ ކުރައްވަމުން އެ ގެންދަވަނީ އޭނާގެ ދެވަނަ ދައުރެވެ.