މަސްވެރިން ކިރުވާ މަހަށް ފައިސާ ނުދެވި ގިނަ ދުވަސްތަކެއް ވެގެން ދިޔުމާއި ގުޅިގެން އެކަމާއި ނުރުހުންފާޅުކޮށް އިހްތިޖާޖު ކުރަމުންދާ މަސްވެރިން، ކޫއްޑޫ ފިޝަރީޒް ކޮމްޕްލެކްސްއިން ކަރަންޓް ކަނޑާލާނެ ކަމުގެ އިންޒާރު ދީފިއެވެ.

މަސްވެރިންނަށް ފައިސާ ދިނުން ލަސްވުމާއި ގުޅިގެން މަސްވެރިން އެކަމުގެ ޝަކުވާތައް ކުރަމުންދާތާ ދުވަސްތަކެއް ވެއްޖެއެވެ. އެކަމާއި ނުރުހުންފާޅު ކުރުމުގެ ގޮތުން މަސްވެރިން ކުރާ އިހްތިޖާޖު ފަށާފައި ވަނީ، އާދީއްތަ ދުވަހު، ރައީސުލްޖުމްހޫރިއްޔާ އެންމެ ދެކުނުގެ ހަތަރު އަތޮޅަށް ފެއްޓެވި ދަތުރުފުޅާއި ދިމާކޮށެވެ.

މަސްވެރިން ޑިމާންޑް ކުރަމުންދަނީ މަސްވެރިން ކިރުވާފަިއވާ މަހަށް މިފްކޯއަށް ދޫނުކުރެވި ހުރިފައިސާ ވީއެންމެ އަވަހަކަށް ދިނުމަށެވެ. އެހެން ނަމަވެސް މިފްކޯގެ ކޭޝްފްލޯއަށް ދިމާވެފައިވާ ދަތިތަކާއި ސަރުކާރަށް ކުރިމަތިވެފައިވާ މާލީ ދަތިތަކާއި އެކު، ސަރުކާރުން މަސްވެރިންނަށް ދޭންޖެހޭ ފައިސާ ހަމައަށް ދިނުމުގައި ވަނީ ދަތިތަކާއި ކުރިމަތިވެފައެވެ.

ކޫއްޑޫގައި މުޒާހަރާކުރާ މަސްވެރިން ތިބީ ކޫއްޑޫ ބަނދަރު ސަރަހައްދުގައެވެ. އަދި ކޫއްޑޫގެ އޮޕަރޭޝަންތައް ހުއްޓިފައިވާ އިރު، ކޫއްޑޫއިން ކަރަންޓް ކަނޑާލާނެ ކަމުގެ އިންޒާރުވެސް މަސްވެރިން ދީފައިވާ ވީޑިއޯތައް މިހާރު ސޯޝަލް މީޑިއާގައި ވަނީ ދައުރުކުރަން ފަށާފައެވެ.

މިއަދުވެސް މަސްވެރިންނަށް ދިމާވެފައިވާ ދަތިތަކާއި ގުޅޭ ގޮތުން، ރައްޔިތުންގެ މަޖިލީހުގައި، ފިޝަރީޒް މިނިސްޓަރ އަޙްމަދު ޝިޔާމާއި ވަނީ ސުވާލުކޮށްފައެވެ. މިނިސްޓަރ ޝިޔާމް ވިދާޅުވީ، މަސްވެރިންނަށް ދޭންޖެހި ނުދެވި ހުރި ފައިސާގެ އަދަދު މިހާރު 310 މިލިޔަނަށް އަރާފައިވާ ކަމަށެވެ.

ސަރުކާރުން ވަނީ، އަންނަ މާރިޗުމަހުގެ 5 ވަނަ ދުވަހުގެ ކުރިން މަސްވެރިންނަށް ދޭންޖެހޭ ހުރިހާ ފައިސާއެއް ދީ ނިންމާނެކަން އިއުލާންކޮށްފައެވެ. އެހެން ނަމަވެސް މަސްވެރިން ބޭނުން ވަނީ އެއަށްވުރެވެސް އަވަހަށް ފައިސާ ލިބުމަށެވެ.