ފެނަކަ ކޯޕަރޭޝަނާއި ހަވާލުކޮށްގެން، ތިން ރަށެއްގައި ހިންގަމުން އައި އައިސްޕްލާންޓްތައް ހިންގުމާއި ގުޅޭ އެއްބަސްވުންތައް ބާޠިލްކޮށްފައިވާ ކަމުގައި، ފިޝަރީޒް މިނިސްޓަރ އަޙްމަދު ޝިޔާމް ވިދާޅުވެއްޖެއެެވެ.

މިނިސްޓަރ ޝިޔާމް މިހެން ވިދާޅުވީ، ރައްޔިތުންގެ މަޖިލީހުގައި މިއަދު މެމްބަރުންނާއި ސުވާލު ކުރުމުގެ ވަގުތުގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ.

މިނިސްޓަރ ޝިޔާމް ވިދާޅުވީ، އައިސް ޕްލާންޓްތައް ހިންގުމުގެ އެއްބަސްވުންތައް ބާޠިލްކުރުމަށް ނިންމީ އެކަމަކީ، ފެނަކައަށް އެކަށީގެންވާ ގޮތުގައި ކުރެވޭނެ ކަމަކަށް ނުވާތީ އާއި އަދި މިހާރު ހަވާލުކޮށްފައި ހުރި އަގުތަކަކީވެސް އެކުންފުންޏަށް އެކަން ކުރެވޭވަރުގެ އަގުތަކެއް ކަމުގައި ނުވާތީ ކަމަށެވެ. އަދި ފެނަކައިންވެސް ބޭނުންވަނީ، އައިސްޕްލާންޓްތައް ހިންގުން ދޫކޮށްލަން ކަމަށާއި، މަސައްކަތްތައް ކުރިޔަށް ގޮސްފައި ހުރި ސްޕީޑަށް ބަލައި މިނިސްޓްރީންވެސް ބޭނުންވަނީ، ފެނަކައިގެ އަތުން އައިސްޕްލާންޓްތައް ނަގަން ކަމުގައި ފިޝަރީޒް މިނިސްޓަރ ޝިޔާމް ވިދާޅުވިއެވެ.

ފިޝަރީޒް މިނިސްޓަރ އަޙްމަދު ޝިޔާމްގެ ވާހަކަފުޅުގައި މަސްވެރިކަމުގެ ސިނާޢަތުގައި، ހުރި ގޮންޖެހުންތައް ފާހަގަކުރައްވައި ވިދާޅުވީ، ކަޅުބިލަ މަސްގަންނަ ފަރާތްތަކުގެ ތެރޭގައި މިވަގުތު މަސްގަންނަމުން ދަނީ، ހަމައެކަނި، ހޮރައިޒަން ފިޝަރީޒް އިން ހިންގާ މާންދޫއަށް ކަމަށެވެ. އަދި ކުރީ ސަރުކާރުން މަހުގެ އަގަށް ގެނައި ބަދަލާއި އެކު އެންސިސްއިން ކަޅުބިލަމަސް ގަތުން ހުއްޓާލާފައިވާ ކަމުގައިވެސް މިނިސްޓަރ ޝިޔާމް ވިދާޅުވިއެވެ.

ކަޅުބިލަ މަހުގެ މަސްވެރިކަމުގެ ސިނާޢަތަށްވެސް އޮތް އެންމެ ބޮޑު ގޮންޖެހުމަކީ މަސްވެރިންނަށް ފަސޭހައިން އައިސް ލިބޭނެ ގޮތްތައް ހަމަޖެހިފައި ނެތުމެވެ.