މަސްގަނެ ޕްރޮސެސް ކުރުމަށްޓަކައި އަމިއްލަ ފަރާތަކުން އެންމެ ފުރަތަމަ ތަރައްޤީކޮށް ހިންގި، ކޮޅުމަޑުލު ފުނައްޑޫ ސަރުކާރަށް ގަނެފައިވާއިރު، އެ ފެސިލިޓީ އަލުން އޮޕަރޭޝަނަށް ގެނައުމަށްޓަކައި ބޮޑު ހޭދައެއް ކުރަންޖެހޭ ކަމުގައި، ފިޝަރިޒް މިނިސްޓަރ އަޙްމަދު ޝިޔާމް ވިދާޅުވެއްޖެއެވެ.

ޝިޔާމް މިހެން ވިދާޅުވީ، ފުނައްޑޫ އޮޕަރޭޝަނަށް ގެނައުމާއި ގުޅޭ ގޮތުން، ތިމަރަފުށީ ދާއިރާގެ މެމްބަރު ޢަބުދުﷲ ރިޔާޒު، ރައްޔިތުންގެ މަޖިލީހުގައި ކުރެއްވި ސުވާލަށް ޖަވާބު ދެއްވަމުންނެވެ. ރިޔާޒް ސުވާލުކުރައްވާފައި ވަނީ، ފުނައްޑޫ އަލުން އޮޕަރޭޝަނަށް ގެނެވޭނެ ދުވަހަކާއި ގުޅޭ ގޮތުންނެވެ. އަދި ތަކުރާރުކޮށް މިއަހަރު ތެރޭގައި ފުނައްޑޫ އޮޕަރޭޝަނަށް ގެނެވިދާނެތޯ ސުވާލުކުރެއްވުމުންވެސް ފިޝަރީޒް މިނިސްޓަރ އެކަމަށް ޖަވާބު ދެއްވާފައެއް ނުވެއެެވެ.

ރިޔާޒުގެ ސުވާލާއި ގުޅިގެން، މިނިސްޓަރ ޝިޔާމް މަޖިލީހުގައި ވިދާޅުވީ، ފުނައްޑޫ އަލުން އޮޕަރޭޝަނަށް ގެނައުމަށްޓަކައި ބޮޑު ހޭދައެއް ކުރަންޖެހޭ ކަމަށެވެ. އެގޮތުން ހަމައެކަނި އެރަށުގެ ބަނދަރު ތަރައްޤީކުރުމަށްވެސް 157.3 މިލިޔަން ހޭދަވާނެކަމަށް އަންދާޒާކުރެވިފައިވާ ކަމުގައި ފިޝަރީޒް މިނިސްޓަރ ވިދާޅުވިއެވެ.

ތ. ފުނައްޑޫ އަލުން އޮޕަރޭޝަނަށް ގެނައުމަށްޓަކައި، ބޭނުންވާ މާލީ އެހީތައް ހޯދުމަށް ކުރީގެ ސަރުކާރުންވެސް މަސައްކަތްކޮށް އެކަން ވަނީ ނާކާމިޔާބުވެފައި ކަމުގައި ފިޝަރީޒް މިނިސްޓަރ ވިދާޅުވިއެވެ.

ފިޝަރީޒް މިނިސްޓަރ އަޙްމަދު ޝިޔާމް ވިދާޅުވީ، ފުނައްޑޫއަށް އެމިނިސްޓްރީގެ ޓީމްތައް ގޮސް އެރަށާއި ފެސިލިޓީތައް ބަލާފައިވާ ކަމަށާއި، އަދި ކުރިން ފާހަގަކޮށްފައިވާ އަގަށްވުރެ ކުޑަ އަގެއްގައި، ފުނައްޑޫ އޮޕަރޭޝަނަށް ގެނެވިދާނެކަން ފާހަގަކުރެވިފައިވާ ކަމަށެވެ.

ފުނައްޑޫއަކީ، ޑީއާރްޕީގެ ކުރީގެ ލީޑަރު އަޙްމަދު ތަސްމީން ޢަލީގެ ޙިއްސާ އޮންނަ ކުންފުންޏަކުން، ހިންގަމުން އައި ރަށެކެވެ. އެރަށުގެ ވިޔަފާރި ބަނގުރޫޓުވެ، ބޭންކަށް ދައްކަން ޖެހޭ ލޯނުތައް ނުދައްކައިގެން، 2013 ވަނަ އަހަރުން ފެށިގެން ބޭންކުން އެރަށް ވިއްކާލަން އުޅެ ނުވިކިފައި ވަނިކޮށް، 2022 މާރިޗު 6 ވަނަ ދުވަހު ވަނީ ސަރުކާރަށް ގަނެފައެވެ. އެރަށް ސަރުކާރުން ގަތީ، ފުނައްޑޫ އޮޕަރޭޝަނަލައިޒްކޮށް ހިންގިދާނެތޯ ބެލުމުގެ ސަރވޭތައް ކުރުމަށްފަހުގައި ކަމަށް، އޭރުގެ ފިޝަރީޒް މިނިސްޓަރ، ޑރ ޙުސައިން ރަޝީދު ޙަސަން ރައްޔިތުންގެ މަޖިލީހުގައި ވިދާޅުވެފައިވެއެވެ. އޭރު ސަރުކާރުން ބުނެފައި ވަނީ 2023 ވަނަ އަހަރުގެ މެއި މަހުގެ ތެރޭގައި ފުނައްޑޫ އަލުން އޮޕަރޭޝަނަށް ގެނެވޭނެ ކަމަށެވެ.