އައްޑޫ ސިޓީގައި އެޅުމަށް ވަޢުދުވެވަޑައިގެންނެވި ބުރިޖުގެ މަސައްކަތް މިއަހަރު ފަށައި، މިދައުރުގެ ތެރޭގައި ނިންމައިދެއްވާނެ ކަމުގައި ރައީސުލްޖުމްހޫރިއްޔާ ޑރ. މުޙިއްމު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އައްޑޫ ސިޓީއަށް އެމަނިކުފާނު ކުރައްވަމުން ގެންދަވާ ދަތުރުފުޅުގެ ތެރެއިން، އައްޑޫ ސިޓީ ހުޅުމީދޫގެ ރައްޔިތުންނާއި ބައްދަލު ކުރައްވައި ދެއްކެވި ވާހަކަފުޅުގައެވެ. މިރަސްމިއްޔާތުގެ ތެރެއިން ވަނީ އައްޑޫ ބުރިޖުގެ ސަރވޭ އާއި ޑިޒައިންގެ މަސައްކަތް ކުރުމަށް، މިސްރުގެ ކުންފުންޏަކާއި ހަވާލުކުރުމުގެ އެއްބަސްވުމުގައި ސޮއެކޮށްފައެވެ.

މިބައްދަލުވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި ވިދާޅުވީ، ފީސިބިލިޓީ އެއްބަސްވުން ދެން ބަދަލުވެގެންދާނީ، ކޮންޓްރެކްޓަކަށް ކަމަށެވެ. މީގެ އިތުރުން އެބުރިޖުގެ ޢަމަލީ މަސައްކަތް މިއަހަރުގެ ތެރޭގައި ފަށައި، މިދައުރުގެ ތެރޭގައި ނިންމާނެ ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.

އައްޑޫ ބުރިޖު ވެގެންދާނީ، މިހާތަނަށް ރާއްޖޭގައި ބުރިޖަކުން ގުޅާލެވޭ އެންމެ ދުރު ސަރަހައްދަށެވެ. އެހެން ނަމަވެސް އެބުރިޖުގެ ފީސިބިލިޓީއާމެދު މިހާރުވެސް އިޤުތިޞާދީ ދާއިރާގެ ބޭފުޅުން ވަނީ ސުވާލު އުފައްދަވާފައެވެ.