ފެބުރުއަރީ މަހުގެ 5 ވަނަ ދުވަހު، ރައީސުލްޖުމްހޫރިއްޔާ، ޑރ މުޙައްމަދު މުޢިއްޒު ރައްޔިތުންގެ މަޖިލީހަށް ހުށައެޅުއްވި ރިޔާސީ ބަޔާނުގައި، ޤައުމަށް ދިމާވެފައިވާ މުޙިއްމު މައްސަލަތަކަށް އަލި އަޅުވާލާފައި ނުވާކަމުގައި، އެމްޑީޕީން ބުނެފިއެވެ.

ރައްޔިތުންގެ މަޖިލީހުގެ ޤަވާއިދުގައިވާ ގޮތުގެ މަތިން އިދިކޮޅު ޕާޓީން މަޖިލީހަށް ރައީސުލްޖުމްހޫރިއްޔާ ހުށައަޅުއްވާ ރިޔާސީ ބަޔާނަށް ޖަވާބުދޭން ޖެހެއެވެ. އެމްޑީޕީގެ ފަރާތުން ރިޔާސީ ބަޔާނަށް ޖަވާބު ދެއްވީ އެޕާޓީގެ ޕާލަމެންޓްރީ ގުރޫޕުގެ ލީޑަރު ރައްޔިތުންގެ މަޖިލީހުގެ އަލިފުށި ދާއިރާގެ މެމްބަރު މުޙައްމަދު ރަޝީދު ޙުސައިން (ބިގޭ)އެވެ.

މެމްބަރު ރަޝީދު ވިދާޅުވީ، ރައީސުލްޖުމްހޫރިއްޔާ މަޖިލީހަށް ހުށައެޅުއްވި ރިޔާސީ ބަޔާނުގައި، ޤައުމަށް މިވަގުތު ދިމާވެފައިވާ މުޙިއްމު މައްސަލަތަކަށް އަލި އަޅުއްވާލާފައި ނުވާ ކަމަށާއި، ސަރުކާރުން ކުރެއްވުމަށް ގަސްތުކުރައްވާ ނުވަތަ ޕްލޭން ކުރައްވާ ކަންކަންވެސް ހިމަނުއްވާފައި ނުވާ ކަމަށެވެ. މިގޮތުން ރާއްޖޭގައި އޮތް އެންމެ ބޮޑު އިޖުތިމާޢީ މައްސަލަކަމުގައިވާ މަސްތުވާތަކެތީގެ މައްސަލައަށް އެއްވެސް މިންވަރަކަށް ރައީސުލްޖުމްހޫރިއްޔާގެ ބަޔާނުގައި އަލިއަޅުއްވާލައްވާފައި ނުވާކަން މެމްބަރު ރަޝީދު ފާހަގަކުރެއްވިއެވެ.

މީގެ އިތުރުން، ޤައުމުގެ އިޤުތިޞާދީ ހާލަތާއި މެދު ރައީސުލްޖުމްހޫރިއްޔާގެ ރިޔާސީ ބަޔާނުގައި އިތުރުފުޅު ހައްދަވައި ސައްޙަ ނޫން މައުލޫމާތު ހިމަނުއްވާފައިވާ ކަމަށާއި، ރާއްޖެއަށް ކުރިމަތިވި އިޤުތިޞާދީ ދަތިކަން މެދުވެރިވާން ޖެހުނު ސަބަބުތައްވެސް ރިޔާސީ ބަޔާނުގައި އޮޅުވާލައްވާފައިވާކަން އޭނާ ފާހަގަކުރެއްވިއެވެ.

މީގެ އިތުރުން މިސަރުކާރުން ދައުލަތުގެ ދަރަނީގެ ވާހަކަތައް ދައްކަވާއިރު، ދަރަނި އަދާކުރާއި ގުޅޭ ޕްލޭންތަކަކީ ކޮބައިކަން ހާމަކޮށްދެއްވާފައި ނުވުމަކީވެސް ޒިންމާދާރުކަން ކުޑައަމަލެއްގެ ގޮތުގައި އޭނާ ފާހަގަކުރެއްވިއެވެ.

ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ރިޔާސީ ބަޔާން ހުށައެޅުއްވީ، މިފެބުރުއަރީ މަހުގެ 5 ވަނަ ދުވަހު ބޭއްވި ރައްޔިތުންގެ މަޖިލިސް މިދައުރަށް ހުޅުވުމުގެ ޖަލްސާގެއެވެ. ރައީސުލްޖުމްހޫރިއްޔާ އިއްވެވި ރިޔާސީ ބަޔާން، ރައީސުލްޖުމްހޫރިއްޔާގެ އޮފީހުގެ ވެބްސައިޓްގައި ވަނީ ޝާއިޢުކޮށްފައެވެ.