އައްޑޫ ސިޓީގެ ހުޅުދޫ އާއި މީދޫ އައްޑޫ ސިޓީގެ އެހެން ރައްތަކާއި ގުޅާލުމުގެ ގޮތުން އެޅުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަޢުދުވެ ވަޑައިގެންނެވި ބުރިޖަކީ އެޅިދާނެ ބުރިޖެއްތޯ ބެލުމަށް ކުރާ ދިރާސާތަކާއި ބްރިޖުގެ ޑިޒައިންނާއި ގުޅޭ މަސައްކަތްތައް ކުރުމުގެ އެއްބަސްވުމުގައި މިއަދު ސޮއެކޮށްފިއެވެ.

އައްޑޫ ސިޓީއަށް މިހާރު ރައީސުލްޖުމްހޫރިއްޔާ ކުރައްވަމުން ގެންދަވާ ދަތުރުފުޅުގެ ތެރެއިން މިއަދު މިއެއްބަސްވުމުގައި ސޮއެކުރެއްވީ ސަރުކާރުގެ ފަރާތުން، އިންފްރާސްޓްރަކްޗާ މިނިސްޓަރު ޑރ. އަބްދުالله މުއްތަލިބެވެ. މިސްރުގެ އަރަބް ކޮންޓްރެކްޓާސްގެ ފަރާތުން މިއެއްބަސްވުމުގައި ސޮއެކުރައްވީ، އެކުންފުނީގެ ބޯޑު މެމްބަރު ހެބާއެވެ.

އައްޑޫ ސިޓީގައި އަޅާ މިބްރިޖާއި ކޯޒްވޭތަކާއި އެކު މަގު ވެގެން ދާނީ ރާއްޖޭގެ އެންމެ ދިގު މަގަށެވެ. އަދި އެކަމަށް ވަރަށް ބޮޑު ހޭދައެއް ހިނގާއިރު، ބުރިޖުގެ ސާވޭގެ މަސައްކަތްކަށް މިއަަހަރުގެ ބަޖެޓުގައި ވަނީ 30 މިލިޔަން ރުފިޔާ ހިމަނާފައެވެ.

އައްޑޫ ސިޓީގެ ވަކިން އޮންނަ ހުޅުމީދޫ އޮންނަނީ އިރުމަތީ ބިތުގައި ކަމަށް ވާއިރު ހުޅަނގު ބިތުގައި އޮންނަ ހިތަދޫއާއި ހުޅުމީދޫއާ ދެމެދު 9 މޭލު ހުރެއެވެ. އަދި ހުޅުމީދޫ އާއި އައްޑޫގެ ގުޅިފައިވާ ރަށްތަކާއި އެކު ދެކުނު ބިތުގައި އޮންނަ ގަމާއި ދެމެދު 4 މޭލު ދުރުމިން ހުރެއެވެ. އައްޑޫގެ ކޮންމެ ފަރާތަކުން މިރަށްތަށް ގުޅާލަން ނިންމި ނަމަވެސް މަދުވެގެން ދެ ކޯޒްވޭ މަގާއި ކަނޑުއޮޅިތައް ހުރަސްކޮށް ދެ ބުރިޖް އަޅަން ޖެހޭނެއެވެ. ކޯޒްވޭތަކާއި ހައިވޭތަކާއި އެކު ގުރޭޓާ މާލެ ކަނެކްޓިވިޓީ ބްރިޖުގެ ޖުމުލަ ދިގުމިނަކީ، 3.4 މޭލެވެ. ސިނަމާލެ ބުރިޖުގެ ދިގުމިނަކީ، 0.91 މޭލެވެ.