މަސްވެރިންނަށް ދޭންޖެހޭ ފައިސާ އަވަހަށް ދިނުމަށް ގޮވާލައި ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒައިނާ އަޙްމަދު ރައްޔިތުންގެ މަޖިލީހަށް ޤަރާރެއް ހުށައަޅުއްވައިފިއެވެ.

މަސްވެރިންނަށް ފައިސާ ނުލިބި ގިނަ ދުވަސްތަކެއް ވެފައިވާތީ، މަސްވެރި އާއިލާ ތަކާއި މަސްވެރިންވެސް ކަންބޮޑުން ފާޅުކޮށް، އަދި ހުވަދުގެ އަތޮޅުގެ ބައެއް މަސްވެރިން އިއްޔެ ކޫއްޑޫގައި އިހްތިޖާޖުވެސްކޮށްފައި ވާއިރު، ރޮޒައިނާ ރައްޔިތުންގެ މަޖިލީހަށް ހުށައެޅުއްވި ޤަރާރުގައި ގޮވާލައްވާފައި ވަނީ، މަސްވެރިންނަށް ދޭންޖެހޭ ފައިސާ އަވަހަށް ދީ ނިންމުމަށެވެ. ރޮޒައިނާ ވިދާޅުވީ، ހުސްވި އަހަރުގެ ޑިސެމްބަރު މަހުގެ 18 ވަނަ ދުވަހުން ފެށިގެން މަސްވެރިންނަށް ފައިސާ ދޫކޮށްފައި ނުވާކަމަށެވެ. އަދި އެކަމުގެ ސަބަބުން މަސްވެރި އާއިލާތަކަށް މާލީ ދަތިތަކާއި ދިމާވެފައި ވާއިރު، މަސްވެރިންނަށް ލިބެންޖެހޭ ފައިސާ ނުދީ ޔުޓިލިޓީ ބިލްތައް ނުދެއްކި އޮތުމުން، ޚިދުމަތް ކަނޑާލާނެ ކަމުގެ ނޯޓިސް ފޮނުވުމަކީވެސް ހަމަޖެހޭ ކަމެއް ނޫން ކަމަށެވެ.

މީގެ އިތުުރުން، މަހުގެ އަގަށް މިސަރުކާރުން ގެނައި ބަދަލާއި މެދުވެސް ރޮޒައިނާ ވަނީ ކަންބޮޑުވުން ފާޅުކުރައްވާފައެވެ. މިގޮތުން މަސްގަތުމަށްފަހު، ފަހުން ކުޑަކުރި އަގަށް މަސްވެރިންނަށް ފައިސާ ދޭން ނިންމުމަކީވެސް ޤާނޫނީ ގޮތުން ބަލާއިރު އެކަން ކުރެވޭނެ ގޮތް ނޫންކަންވެސް ރޮޒައިނާ ވަނީ ފާހަގަކުރައްވާފައެވެ.

މީގެ އިތުރުން ފައިސާ ނުދެވިގެން އުޅެނީ ދައުލަތުގެ މާލީ ހާލަތު ގޯސްވެގެން ކަމުގައި ބުނާއިރު، ސިޔާސީ ވަޒީފާތަކާއި މަޤާމުތަކަށް މީހުން އިތުރުކުރަމުންދާތީ، މެމްބަރު ރޮޒައިނާ ވަނީ އެކަމާއި ގުޅޭ ގޮތުންވެސް ސުވާލު އުފައްދަވާފައެވެ.

އިއްޔެ އައްޑޫ ސިޓީގައި، މަރަދޫ އަދި މަރަދޫ ފޭދޫގެ ރައްޔިތުންނާއި ބައްދަލުކުރައްވައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި ވިދާޅުވީ، މަސްވެރިންނަށް ދޭންޖެހޭ ފައިސާގެ ތެެރެއިން 298 މިލިޔަން ރުފިޔާ ނުދެވި އެބައޮތް ކަމަށެވެ. އަދި އެފައިސާ ރޯދައިގެ ކުރިން މަސްވެރިންނަށް ދޫކުރައްވާނެ ކަމުގައިވެސް ރައީސް ވަނީ ވިދާޅުވެފައެވެ.

ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ރިޔާސީ ވަޢުދަކީ، މަސްވެރިން ކިރުވާ މަހަށް ގިނަވެގެން 48 ގަޑިއިރުގެ ތެރޭގައި ފައިސާ ދިނުން ނަމަވެސް އެވަޢުދަކީ ފުއްދޭނެ ވަޢުދެއް ނޫންކަމުގައި ފިޝަރީޒް މިނިސްޓަރ އަޙްމަދު ޝިޔާމް ވެސް ވަނީ ފާހަގަކުރައްވާފައެވެ. ޝިޔާމް ވިދާޅުވީ މިހާރު ސަރުކާރުން މަސައްކަތް ކުރަނީ ހަފްތާއިން ހަފްތާއަށް މަސްވެރިން ކިރުވާ މަހަށް ފައިސާ ދޫކުރުމަށް ކަމަށެވެ.