ދިވެހިރާއްޖެއަށް ދިމާވެފައިވާ މައްސަލަތަކަކީ ކޮބައިކަން އެނގިވަޑައިގަންނަވާކަމަށާއި، ކެމްޕެއިނަށް ނުކުމެވަޑައިގަތީވެސް އެކަންކަން އެނގި ހުންނަވައިގެން ކަމުގައި ރައީސުލްޖުމްހޫރިއްޔާ، ޑރ. މުހައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިހާރު އެމަނިކުފާނު ދެކުނުގެ ހަތަރު އަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގެ ތެެރެއިން، އިއްޔެ އައްޑޫ ސިޓީ މަރަދޫ އަދި މަރަދޫ ފޭދޫގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ ވިދާޅުވީ، ރާއްޖެއަށް ދިމާވެފައިވާ މައްސަލަތަކުގެ ތެރެއިން އިޤުތިޞާދީ މައްސަލަތައް ހައްލުކުރުމަށް މިސަރުކާރުން މަސައްކަތްތައް ކުރަމުން ގެންދާ ކަމަށެވެ. މިގޮތުން ރާއްޖޭގެ އިޤުތިޞާދީ އެޖެންޑާއަށް އައިއެމްއެފްއިން މަރުޙަބާ ކިޔާ ކަމަށެވެ.

ރައީސުލްޖުމްހޫރިއްޔާ ވިދާޅުވީ، އިޤުތިޞާދު މިއަދު އޮތް ހާލަތުން އަރައިގަންނަން އުނދަގޫ ފިޔަވަޅުތަކެއް އަޅަން ޖެހޭ ކަމަށެވެ.

ވަޢުދުތައް ވެވަޑައިގެންނެވީ ރާއްޖޭގެ ހާލަތު އެނގި ހުންނަވައިގެން ކަމުގައި ރައީސުލްޖުމްހޫރިއްޔާ ވިދާޅުވި އިރު އެމަނިކުފާނުގެ ސަރުކާރާއި ހަވާލުވެ ވަޑައިގެން އެޅުއްވވި ފިޔަވަޅުތަކުގެ ސަބަބުން ރާއްޖޭގެ މާލީ ހާލަތު އިތުރަށް ގޯސްވެފައިވާކަމަށް މާލީ ދާއިރާގެ ތަޖުރިބާކާރު ބޭފުޅުން ގެންދަވަަނީ ވިދާޅުވަމުންނެވެ.