މަސްވެރިންނަށް ނުދެވި ހުރި ހުރިހާ ފައިސާއެއް މިފެށޭ މާރިޗު މަހުގެ 5 ވަނަ ދުވަހުގެ ކުރިން ދީ ނިންމާނެ ކަމުގައި ފިޝަރީޒް މިނިސްޓަރ އަޙްމަދު ޝިޔާމް ވިދާޅުވެއްޖެއެވެ.

މިނިސްޓަރ ޝިޔާމް މިހެން ވިދާޅުވީ، ކޫއްޑޫގައި މަސްވެރިން ކުރަމުންދާ އިހްތިޖާޖާއި ގުޅިގެން ކުރެއްވި ޕޯސްޓްގައެވެ.

މިނިސްޓަރ ޝިޔާމް ވިދާޅުވީ، މިސަރުކާރަށް ވާރުތަވީ 250 ވަރަކަށް މިލިޔަން ރުފިޔާ އާއެކު މިހާރު ނުދެވި ހުރި ޖުމްލަ 280 މިލިޔަން ރުފިޔާދޫކޮށް،  މާރޗު މަހުގެ 5 ވަނަދުވަހުގެ ނިޔަލަށް ބެކްލޮގް ފިލުވާނެ ކަމަށެވެ. އެމަނިކުފާނު އިތުރަށް ވިދާޅުވީ، މަހުގެ އަގު މުރާޖަޢާ ކުރި ދުވަހުން ފެށިގެން ކިރުވާފައިވާ މަހަށްވާ 26 މިލިއަން ރުފިޔާ މިހަފްތާގެ ތެރޭގައި ދޫކުރާނެ ކަމަށާއި،  މިފްކޯއަށް ކިރާ މަހަށް ހަފްތާއެއްތެރޭގައި ފައިސާ ދެވޭނެ އިންތިޒާމު މިހަފްތާއިން ފެށިގެން ހަމަޖައްސަވާނެ ކަމަށެވެ. މަސްވެރިންގެ ކަންކަން ރައީސުލްޖުމްޙޫރިއްޔާ ޑރ. މުޙައްމަދު މުޢިއްޒު ގެންދަވަނީ ވަރަށްގާތުން ބައްލަވަމުންކަމަށާއި  ކޫއްޑޫގައި ތިއްބެވި މަސްވެރިންނާ ބައްދަލުކުރެއްވުމަށްޓަކައި ކޫއްޑޫއަށް ވަޑައިގަންނަވާނެ ކަމުގައިވެސް ޝިޔާމް ވިދާޅުވިއެވެ. މިނިސްޓަރ ޝިޔާމް ވިދާޅުވީ، މަސްވެރިންގެ ހުރިކަންބޮޑުވުންތައް އަދި މަސްވެރި ސިނާއަތުގައި ހުރި ގޮންޖެހުންތައް މިސަރުކާރުން ހައްލު ކުރާނެ ކަމަށެވެ.

އަދި ‏ކޫއްޑޫގައި މަސްވެރިން މިވަގުތު ކުރަމުންދާ އިހުތިޖާޖުގެ ބައިވެރިންގެ ނުތަނަވަސް ކަމަކީ މިވަގުތު ސަރުކާރަށް އެކަމެއްގެ ކަންބޮޑުވުން އެންމެބޮޑަށް އޮތް އަދި އެންމެބާރަށް ހައްލު ކުރަން މަސައްކަތް ކުރަމުން ގެންދާ ކަންބޮޑުވުން ކަމުގައިވެސް މިނިސްޓަރ ޝިޔާމް ވިދާޅުވިއެވެ. މީގެ އިތުރުން ޑިމޮކްރެޓިކް މުޖުތަމަޢުތަކުގައި ޙައްޤުހޯދަންކުރާ ސުލްހަވެރި އިހުތިޖާޖުތަކަށް މަރުޙަބާކިޔާނެކަމަށާއި، ކޫއްޑުގެ އޮޕަރޭޝަން ކުރިޔަށް ގެންދެވޭނެ މާހައުލެއް އޮތުމަކީ އިހުތިޖާޖުގައި ބައިވެރިނުވާ އެތައް ދޯންޏެއްގެ މަސްވެރިންގެ ވަރަށް ބޮޑު އެދުމެއްކަމުގައި ވުމާއިއެކު އެ މާހައުލު ޤާއިމުކޮށްދެއްވުމަށް އިހުތިޖާޖުގައި ތިއްބެވި މަސްވެރިންގެ ކިބައިން އެދޭކަމުގައިވެސް މިނިސްޓަރ ޝިޔާމް ވަނީ ވިދާޅުވެފައެވެ.