Advertisement
އިސްރަށްވެހިންގެ ނާދީ --
ހަވާސާ ކުރެވިފައި ތިބި ހުރިހާ ފަރާތްތަކަށް އިސްކަންދޭނަން: ރައީސް
ދިވެހި މިމުޖުތަމަޢުގައިވެސް ހަވާސާކުރެވިފައިވާ އެތައް ބަޔަކު އެބަތިބި ކަމަށާއި އެމީހުންނަށް އަޅާލައި ދައުލަތުގެ ފަރާތުން ފޯރުކޮށްދެންޖެހޭ އެންމެހާ ޚިދުމަތްތައް ފުރިހަމަ ގޮތެއްގައި ފޯރުކޮށްދެއްވުމަށް މަސައްކަތް ކުރައްވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، މާލޭގައި ހުޅުވި ފުރަތަމަ އިސްރަށްވެހިންގެ މަރުކަޒު ހުޅުއްވައި ދެއްވައި ދެއްކެވި ވާހަކަފުޅުގައެވެ.
އިސްރަށްވެހިންގެ މަރުކަޒު ހުޅުވާފައި ވަނީ، މަޖީދިއްޔާ ސްކޫލުގެ އުތުރުން އަމީރު އަހްމަދު މަގަށް ވާގޮތަށް ހުރި ކުރީގެ ނާދީ ތަމައްދުން އިމާރާތުގައެވެ. އެންމެފަހުން އެތަނުގައި ހިންގާފައި ވަނީ، ޤުރުއާނާއި ބެހޭ މަރުކަޒެވެ.
އެމަރުކަޒު ހުއްޅުއްވައި ދެއްވައި ވާހަކަފުޅު ދައްކަވަމުން ރައީސް ވިދާޅުވީ، ނުކުޅެދުންތެރިކަން ހުރި ފަރާތްތަކަށް ޚާއްޞަ މަރުކަޒުތަކަށް މިހާތަނަށް ހުރީ މާބޮޑު ސަމާލުކަމެއް ނުދެވި ކަމަށެވެ. އަދި ބަޖެޓުންވެސް ޚަރަދުކުރެވެނީ ވަރަށްކުޑަ އެއްޗެއް ކަމަށާއި، އެހެން ނަމަވެސް، މިސަރުކާރުން، އެކަންވެސް ބަދަލުކުރަން ނިންމައި، އެ މަސައްކަތް ފަށާފައިވާކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ.
އިސްރަށްވެހިންގެ ނާދީ، ހުޅުއްވައި ދެއްވީ ރައީސުލްޖުމްހޫރިއްޔާގެ ދެކަނބަލުންނެވެ. އެތަން ހުޅުއްވައި ދެއްވުމަށް ފަހުގައި ރައީސުލްޖުމްހޫރިއްޔާ އާއި އެމަނިކުފާނުގެ އަނބިކަނބަލުން ވަނީ، ނާދީގެ ހުރި ޚިދުމަތްތަކާއި ވަޞީލަތްތައް ބައްލަވާލައްވާފައެެވެ.
