ކުރިޔަށް އޮތް 20 ވަނަ ރައްޔިތުންގެ މަޖިލީހުގެ އިންތިހާބުގައި އެންމެ ގިނަ އަންހެން ކެނޑިޑޭޓުން ވާދަކުރަނީ ދަ ޑިމޮކްރެޓްސްއިންނެވެ. އެ ޕާޓީއިން ޖުމްލަ 39 ދާއިރާއަކަށް ވާދަކުރާއިރު، އޭގެ ތެރެއިން 12 ކެނޑިޑޭޓުންނަކީ އަންހެން ކެނޑިޑޭޓުންނެވެ. އެއީ އެ ޕާޓީއިން ވާދަކުރާ ކެނޑިޑޭޓުންގެ %30 އެވެ.

ދެން އެންމެ ގިނަ އަންހެން ބޭފުޅުން ވާދަކުރައްވަނީ އިދިކޮޅު އެމްޑީޕީއިންނެވެ. އެ ޕާޓީއިން 90 ދާއިރާއެއްގައި ވާދަކުރާއިރު، އޭގެ ތެރެއިން 6 ދާއިރާއަކަށް އަންހެނުން ވާދަކުރާނެއެވެ.

މީގެ އިތުރަށް އަންހެން ބޭފުޅުން ދެން ވާދަކުރައްވަނީ ޖުމްހޫރީ ޕާޓީ އާއި ވެރިކަން ކުރާ ޕީއެންސީއިންނެވެ. މިއިން ކޮންމެ ޕާޓީއަކުން ވެސް ދެ އަންހެން ކެނޑިޑޭޓަކު ނެރުމަށް ވަނީ ފޯމު ހުށަހަޅާފައެވެ. އަމިއްލަ ގޮތުން ބައިވެރިވާ މީހުންގެ އަދަދު 130 އަށް އަރާފައިވާއިރު، އޭގެ ތެރެއިން 20 ކެނޑިޑޭޓުންނަކީ އަންހެން ބޭފުޅުންނެވެ.

މަޖިލީހަށް ވާދަކުރައްވާ ޕާޓީތަކުގެ ތެރެއިން އެއްވެސް އަންހެން ކެނޑިޑޭޓަކު ނުނިކުންނަވަނީ އަދާލަތު ޕާޓީއާއި، އެމްޑީއޭއާއި އެމްއެންޕީއިންނެވެ.