ސްރީލަންކާގެ 10 ވަނަ ނޭޝަނަލް ސްކައުޓް ޖަމްބޮރީގައި ބައިވެރިވާ ދިވެހި ވަފުދާ ބައްދަލުކުރައްވައި ރައީސުލްޖުމްހޫރިއްޔާގެ ނައިބު ހިތްވަރުދެއްވައިފިއެވެ. ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވީ،  ރާއްޖޭގެ ސްކައުޓް ހަރަކާތަށް 60 އަހަރަށްވުރެ ގިނަ ދުވަސް ވެފައިވާއިރު ރާއްޖެފަދަ ވަށައިގެން މާކަނޑުއޮތް ތިމާވެށީގެ ނާޒުކު ޤައުމެއްގައި ސްކައުޓުން އަގުހުރި ޤައުމީ ހިދުމަތްތަކެއް ކޮށްދީފައިވާކަމަށެވެ. 

ޤައުމަށް ދިމާވާ އެންމެ ދަތި އުނދަގޫ ހާލަތުގައިވެސް އެންމެ ހަރަކާތްތެރި އެންމެ މަދަދުވެރި ބައެއްގެ ގޮތުގައި ފެނިގެންދަނީ ފަހުރުވެރި ދިވެހި ސްކައުޓުންކަމަށް އެމަނިކުފާނު ވިދާޅުވިއެވެ. މި ޖަންބަރީއަށް ލަންކާއަށް ޖަމާވާ އެކި ޤައުމުތަކުގެ ތެރޭގައި އެންމެ ބޮޑު ޖަމާއަތަކީ ދިވެހި ސްކައުޓުންކަމަށް ނައިބު ރައީސް ފާހަގަކުރެއްވިއެވެ. އަދި މި ޖަންބަރީގައި ދިވެހި ސްކައުޓުން ރާއްޖެއަށް ރީތި ނަން ހޯދައިދިނުމަކީ އެންމެހައި ދިވެހިންގެވެސް އުންމީދުކަމަށް އެމަނިކުފާނު ވިދާޅުވިއެވެ.

ހަމަ އެއާއެކު އެމަނިކުފާނު ވަނީ ޖަމްބޮރީ ތެރޭގައި ސްކައުޓުން ހަރަކާތްތެރިވާއިރުވެސް ރިވެތި އަޚުލާޤާއި، ސުލޫކުން ނަމޫނާ ދައްކައި، އެކުވެރިކަމާއި، ބަދަހިކަންމަތީ ލިބޭ ފުރުޞަތުގެ ބޭނުން ހެޔޮގޮތުގައި ހިފައި، ނަމާދަށް ފަރުވާތެރިވެ، ވަގުތަށް ކަމޭހިތައި، އިސްވެރިންނަށް އިޙުތިރާމުކުރާ ބަޔަކަށްވުމަށް ނަސޭހަތްތެރިވެ ވަޑައިގެންފައެވެ.މިއަދުގެ ބައްދަލުކުރެއްވުމުގައި ރައީސުލްޖުމްހޫރިއްޔާގެ ނައިބު ވަނީ ސްކައުޓް ޖޮމްބޮރީ ފަދަ ހަރަކާތްތައް އިންތިޒާމު ކުރުމުގައި ހަރަކާތްތެރިވާ ލީޑަރުން ކުރައްވާ މުހިންމު، އަގުހުރި މަސައްކަތްތައް ފާހަގަކުރައްވާފައެވެ. އަދި އެމަނިކުފާނު ވަނީ އެބޭފުޅުން ދިވެހި މުޖުތަމަޢު ހަރުދަނާކުރުމަށް ކުރައްވާ ޚިދުމަތްތަކަށް އިޚުލާސްތެރިކަމާއެކު ޝުކުރު އަދާކުރައްވާފައެވެ.

ސްރީލަންކާގެ 10 ވަނަ ނޭޝަނަލް ސްކައުޓް ޖަމްބޮރީގައި ދިވެހިރާއްޖެއިން 242 ސްކައުޓުން ބައިވެރިވެއެވެ. މި ޖަމްބޮރީއަށް ލަންކާއަށް ޖަމާވާ ޤައުމުތަކުގެ ތެރެއިން އެންމެ ބޮޑު ޖަމާއަތަކީ ދިވެހި ސްކައުޓުންނެވެ.