ރައްޔިތުންގެ މަޖިލީހުގެ އިންތިޚާބުގައި ވާދަކުރާ ކެނޑިޑޭޓުންގެ ކެންޑިޑޭޓް ނަމްބަރު ތަރުތީބު ކުރުމުގެ ގުރުއަތުލުން އިލެކްޝަންސް ކޮމިޝަނުން މިއަދު ކުރިއަށް ގެންގޮސްފިއެވެ.

މިގޮތުން މިއަދު މެންދުރު ފަހު، 14:30 އިން ފެށިގެން، 18:30 އާއި ހަމައަށް ގުރުއަތުލުން ކުރިޔަށް ގެންގޮސް، 93 ދާއިރާއަށް ވާދަކުރާ 381 ކެންޑިޑޭޓުންގެ ކެންޑިޑޭޓް ނަމްބަރު މިހާރު ވަނީ ތަރުތީބުކޮށްފައެވެ.

ކެންޑިޑޭޓުންގެ މެދުގައި ގުރުއަތުނެގުން ބާއްވާފައި ވަނީ، އިންތިޚާބާ ބެހޭ މަރުކަޒު، ދަރުބާރުގޭގައެވެ. 

ރައްޔިތުންގެ މަޖިލީހުގެ އިންތިޚާބަށް އިލެކްޝަންސް ކޮމިޝަނުން ހުޅުވާލި މުއްދަތު ހަމަވީ، މިމަހުގެ 14 ވަނަ ދުވަހަށެވެ. އަދި އިންތިޚާބު ބޭއްވުމަށް އިލެކްޝަންސް ކޮމިޝަނުން މިހާރު ކަނޑައަޅާފައި އޮތީ، މާރިޗު މަހުގެ 17 ވަނަ ދުވަހެވެ. އެހެން ނަމަވެސް ރަމަޟާން މަހުގެ ތެރޭގައި އިންތިޚާބުތައް ނުބޭއްވުމަށް ލާޒިމްކޮށް، އާއްމު އިންތިޚާބާއި ބެހޭ ޤާނޫނަށް ގެނެސްފައިވާ އިސްލާޙް ރައީސުލްޖުމްހޫރިއްޔާ ތަސްދީޤު ކުރައްވައިފި ނަމަ، ނުވަތަ އަނބުރާ ފޮނުއްވާ ލެއްވުމަށްފަހު، މަޖިލީހުން ހަމަ އެއޮތްގޮތަށް އަލުން ފާސްކުރައްވައިފިނަމަ، އެބިލް ޤާނޫނަކަށްވެ ޢަމަލުކުރަންޖެހޭނެތީ، މާރިޗު 17ގައި އިންތިޚާބު ބޭއްވިދާނެ ކަމަކަށް ނުބެލެވެއެވެ.