އައިއެމްއެފް ގެ ޕްރޮގްރާމަކަށް ދާންޖެހޭނީ ސަރުކާރުގެ ކަންކަން ކުރުމުގެ ވައްޓަފާޅި ނެތިގެންކަމުގައި ކުރީގެ އިކޮނޮމިކް މިނިސްޓަރ ފައްޔާޒު އިސްމާއީލް ވިދާޅުވެއްޖެއެވެ.

ފައްޔާޒު މިހެން ވިދާޅުވީ، ރާއްޖެ ބަނގުރޫޓުވެއްޖެ ކަމަށްބުނެ ސޯޝަލްމީޑިއާގައި ފަތުރަމުންދާ ވާހަކަތަކަށް ރައްދުދެއްވައި، މިސަރުކާރުގެ އިކޮނޮމިކް މިނިސްޓަރ މުޙައްމަދު ސަޢީދު އެކްސްގައި ކުރެއްވި ޕޯސްޓާއި ގުޅިގެން ފައްޔާޒު ކުރެއްވި ޕޯސްޓްގައެވެ.

ފައްޔާޒު ވިދާޅުވީ، ރާއްޖޭގެ އިގްތިސާދީ ހާލަތު ރަނގަޅުކަމަށާއި، އަބަދުވެސް ޗެލެންޖް އޮތީ ސަރުކާރުގެ މާލީ ހާލަތުގައި ކަމަށެވެ. އަދި ޚާރިޖީ ގުޅުންތައް ދަމަހައްޓައި ރައްޔިތުންނަށް ބޮޑު ތަކުލީފަކަށް ނުވާގޮތައް ކަންކަން ހައްލުކުރެވެން ވާނެ ކަމުގައި ފައްޔާޒު ވިދާޅުވިއެވެ. ފައްޔާޒު ވިދާޅުވީ، އައިއެމްއެފް ގެ ފްރޮގްރާމަކަށް ނުގޮސްވާންވާނެ ކަމަށާއި، ދާންޖެހޭނީ ކަންކުރުމުގެ ވައްޓަފާޅިނެތްނަމަ ކަމަށެވެ.

ބޭރުގެ ދަރަނި ނުދެއްކި ރާއްޖެ ބަނގުރޫޓުވެއްޖެ ކަމަށް ބުނެ، ސޯޝަލް މީޑިއާގައި ސަރުކާރާއި ދެކޮޅު އެކްސްއެކައުންޓަކުން ދަނީ ސޯޝަލްމީޑިއާގައި ވާހަކަތައް ފަތުރަމުންނެވެ.

އެކަމާއި ގުޅިގެން މިސަރުކާރުގެ އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވީ، ރާއްޖޭގެ މާލީނިޒާމްގެ އިތުބާރުގެއްލުވާލަން ފިލައިތިބެ ބަޔަކު މަސައްކަތްކުރަނީ އިންތިޒާރުކުރިގޯސްހާލަތަށް ރާއްޖެވައްޓާނުލެވުމުން ސިޔާސީގޮތުން މާޔޫސްވެގެންކަމަށެވެ. އަދި ރާއްޖެވަކިޕްރޮގްރާމެއްގައި ބައިވެރިވާކަށްނުޖެހޭ ކަމަށާއި، އިޤްތިޞާދީޙާލަތު އައްނަނީ ކުރީންލަފާކުރިވަރަށްވުރެންވެސް ބާރަށް ރަނގަޅުވަމުންގައި އިކޮނޮމިކް މިނިސްޓަރ ސަޢީދު ވަނީ ވިދާޅުވެފައެވެ.

ބޭރުގެ ދަރަނި ދެއްކޭނެ ގޮތެއް ނެތި ރާއްޖެ ބަނގުރޫޓުވެއްޖެކަމަށް ބުނެ ވާހަކަތައް ފަތުރަމުން ދާއިރު، ސަރުކާރުން ވަނީ އެކަން ދޮގުކޮށްފައެވެ.